Қайтарымсыз қайырымдылық жасаудан қол үзбеген халқымыз биылғы Еріктілер жылында атқарылып жатқан жұмыстармен қоғамда мейірімсіз ел болмайтынын байқатты.
Мемлекет басшысы Қасым-Жомарт Тоқаев биылғы 2020 жылды «Еріктілер жылы» деп жариялап, адамдарға шын ниетімен көмектесіп, оны науқанға айналдырмау қажетін айтқан болатын. Ерікті болу қоғамға адал қызмет атқара жүріп, ата-бабадан аманат болып жеткен адамгершілік қасиеттің адам болмысынан ажырамауына жастар тарапынан көп жұмыс атқарылуда. Еріктілердің бойындағы қайрат-жігер әр азаматты ынталандыруы тиіс. Біз қазір ел басына күн туған сәтте әр күн сайын осыған куә болып отырмыз.
Әлем елдерін үрейлендіріп, ажал құштырып жатқан індет байтақ елімізге де жетті. Бұл жолы індетті бірігіп жеңу мүмкіндігі айқын болғандықтан еріктілер жеке бастарын қатерге тігіп, аз қамтылған отбасыларды, жалғызбасты қарттарға азық-түлік, дәрі-дәрмек жеткізіп көмектесуде.
Атырауда да коронавирусқа қарсы күрес үшін облыстық Ішкі саясат басқармасы Азаматтық орталық КММ-і жанынан еріктілер штабын құрды. Штаб бірнеше бағыт бойынша қызмет атқарады. Дәлірек айтқанда, автокөлігі бар азаматтар тұрғындарға азық-түлік, дәрі-дәрмек таратып, медицина еріктілері жедел жәрдем қызметкерлеріне жәрдемдесіп, мониторинг жүргізетін еріктілер азық-түлік бағасына мониторинг жасауға көмектесуде. Бұдан басқа, полиция қызметкерлеріне көмекке рейдке шығатын еріктілер мен ерікті тігіншілер тұрғындарды бірнеше мәрте пайдалануға болатын бетпердемен қамтамасыз етуде.
Атыраулық еріктілер штабы жуырда ғана эстафета бастап, Қазақстанның әр аймағындағы қайырымды жандардан екі күнде 1 002 330 теңге жинады. Олар осы уақытқа дейін жалғызбасты қарттарға, көпбалалы аналарға, мүмкіндігі шектеулі жандарға, барлығы 164 отбасына азық-түлік себетін таратты. Азық-түліктің бір себеті 13 600 теңгеден 14 800 теңгеге дейінгі баға мөлшерінде алынған.
Азаматтық орталықтың өкілдері берген мәліметке сүйенсек, ерікті тігіншілер бірнеше мәрте пайдалануға арналған 12 269 бетперде тікті. Полициямен бірге рейдке шыққан еріктілер де бар. Кейбір қала тұрғындары әлі карантин ережесін сақтамай жүр. Мониторинг жүргізетін еріктілер аудандарға бөлініп, азық-түлік бағасына мониторинг жүргізе бастады. Әрқайсысы дүкенді, супермаркетті аптасына үш рет аралап шығады. Штабта жүзге жуық ерікті бар. Олардың арасында таксистер, компания қызметкерлері, үйде отырған жандар, вахтада жұмыс істеген азаматтар да кездеседі. Олардың мақсаты бір. Ол – аймақтағы індеттің жайылып, халықтың өміріне қауіп төндіруіне жол бермеу.
«Золотое время» қоғамдық бірлестігінің жетекшісі Айгүл Уалиева: «Еріктілер штабын ұйымдастырып, біздің пайдалы іспен шұғылдануымызға мүмкіндік тудырғаны үшін Азаматтық орталыққа рақмет айтамын. Біз бес бағыт бойынша жұмыс істеп жатырмыз. Адамдар әлі де сақтық шараларын қатаң сақтаса екен. Аса қажеттілік болмаса үйде отырғаны дұрыс. Ал шыққан жағдайда бетперде және медициналық қолғап киюі керек. Сол кезде ғана біз қауіптің алдын аламыз» деп тұрғындарды карантин талаптарын сақтауға үндеді.
Жасыратыны жоқ, елде карантин жарияланған сәтте-ақ азық-түлік тапшылығы болады деген халықтың базар мен дүкеннен жаппай тамақ сатып алу үшін кезекке тұрғанын көргенбіз. Үкімет пен жергілікті атқарушы билік тарапынан айтылған түсіндірулерге құлақ аспаған халықтың алаңдаған көңілін өз пайдасына жаратып, тауарын қымбаттатқан сатушылар қатары да көп кездесті. Дәріхана сөресінен антисептик пен бетперделер, спирттер жым-жылас жоқ болды. Осындай сын сәтте Азаматтық орталықтың «Іскер ана» жобасы бойынша тігіншілік кәсіпті үйренген қыз-келіншектер аз қамтылған отбасыларға бетпердені тегін таратып, таба алмай сарсаңға түскен тұрғындарға қолжетімді бағамен сатуды қолға алды.
«Самға жүрегім» қоғамдық бірлестігінің жетекшісі Эльвира Аралованың айтуынша, қазіргі таңда супермаркетте, базарда баға тұрақты. Аптасына 3 рет барлық сауда нүктелерін тексеріп жүрген олар ең қажетті азық-түліктің қымбаттамағанын айтып отыр.
Еріктілер рейдке көп шығып, тұрғындарға тығыз шаруасы болмаса үйлерінде отыруға кеңес беріп, бетперде тағып жүрудің маңызын түсіндіруді өз міндетіне алған.
«Атырау қаласының еріктілеріне қиын кездегі көмектері үшін рақмет. Аз қамтылған, жалғызбасты көпбалалы аналарға, қарттарға қол ұшын созғаны үшін ризамын. Бір-бірімізге осылай қолдау көрсету арқылы біз бірлігі жарасқан ел екенімізді көрсете алдық деп ойлаймын. Ниеттеріңе рақмет. Бұл кішкентай көмек адамның көңілін көтеріп, қуаныш сезімін сыйлады. Жергілікті тұрғындар карантин талаптарын сақтаса бәрі жақсы болады», – дейді. еріктілердің көмегі көрсетілген аз қамтылған отбасы атынан алғыс білдірген Ләззат Есенбаева.
Бүгінде елімізде өз еркімен қоғамға пайдасын тигізуді көздейтін еріктілердің қатары жыл санап артып келеді. Бастапқыда ата-анасының қамқорлығынсыз қалған балаларға көмектесіп, жалғыз тұратын қарттардың үйлерін тазалап, бау-бақшасына көмектесіп, азық-түлігі мен дәрі-дәрмегін өздері жиған еріктілер тобы «Жүректен-жүрекке» қайырымдылық қоры қоғамдық бірлестігінің жетекшісі Әйгерім Досқалиева жетекшілік етуімен өңірге белгілі болған.
Азаматтық орталықтың директоры Әйгерім Досқалиеваның айтуынша, көмекке мұқтаж жандарға азық-түлік жеткізу ісінің басталғанына бір аптадан асқаннда: «Қалалық жұмыспен қамту бөлімі тізімінде бармын, денсаулығыма байланысты кезекте тұрмын, 109 қауырт желі операторы нөміріңізді берді» деп хабарласқан жандардың айтарын тыңдап, қолымыздан келгенше көмектесіп отырмыз. Бүгін бізге бір өтініш түсті. Өтініш иесі 90 жастағы әжейге көмектесуін сұрапты. Кім-кімге де көмектесеміз, бірақ жалғызбасты қарттар бізде – бірінші орында. Азық-түлігімізді алып, әжені іздеп бардық. Есікті ұзақ қағып тұрдым. Есікті ашқан әжеге ерікті екенімізді айттық. Алғысын жаудырып жатыр. Әженің әкесі соғысқа қатысқан екен. Төрде әкесінің медалі ілулі тұр. Кіреберіске қызының суретін қойыпты. «Жалғыз қызым болған, ол да дүниеден өтті. Қызымды ойлаймын деп ауырып қалдым» деп көзіне жас алды. Әжені өз бақылауымызға аламыз деп отырмыз. Біз қайырымдылық эстафетасын бастап, 2 күнде 1 002 330 теңге жинадық. Халықтың сеніміне көп рақмет» деген Әйгерім Жәрдемқызы республиканың барлық қалалары мен өңірлерінен эстафетаға қатысып, қаражат аударған жандарға шексіз ризашылығын жеткізді.
Елімізде COVID-19 індеті өршіп тұрған уақытта денсаулығына сенімді болып, өз еркімен ақысыз қызмет көрсетіп, қоғамдық жұмысқа белсенді қатысып отырған еріктілерді ер демеске болмайды. Сайып келгенде, қазақ халқының қанында бар қайырымдылық қасиеттің ұрпаққа жалғастығы осындай істермен жалғасып, өміршең болатыны сөзсіз. Еліміздің ұлттық құндылықтарды сақтай білген тұлғасын қалыптастыруда еріктілердің ерлікпен тең өжеттілігі өнеге болуы – заңдылық.
Тұрсын ЖҰМАБЕКҚЫЗЫ,Атырау облысы
Тұрсын ЖҰМАБЕКҚЫЗЫ,
Атырау облысы
