Қазақстанда төтенше жағдай режимі салдарынан азық-түлік бағасы 9,3%-ке өскен. Ұлттық банктің төрағасы Ерболат Досаев мәлімдеуінше, төтенше жағдай енгізілген наурыз айында жылдық инфляция биылға белгіленген 4-6% нысаналы дәлізден асып, 6,4%-ке дейін көтерілген. «Азық-түлік тауарлары 9,3%-ке қымбаттады. Мұндай динамика, бір жағынан, көкөніс бағасының науқандық өсуінен, ал екінші жағынан карантин кезіндегі сұраныстан туындады», – деді Досаев. Наурыз айында қант – 8,5%-ке, көкөніс пен жеміс-жидек – 5,1%-ке, қарақұмық жармасы – 2,5%-ке қымбаттаған. Азық-түлікке жатпайтын тауарлар бағасы жылдық мәнде 5,5%-ке өсті. Ақылы қызмет бағасының өсу қарқыны 3,5%-ке дейін үдеді. Көлік, байланыс және тұрғын үй-коммуналдық шаруашылығының жекелеген қызмет тарифтері артқан. Досаев төтенше жағдай енгізілген наурыз айында жылдық инфляция биылға белгіленген 4-6% нысаналы дәлізден асып, 6,4%-ке дейін көтерілгенін атап өтті.