Дәрі бағасын өсіре алмайсыз
Дәрі бағасын өсіре алмайсыз
Бүгінде дәрі-дәрмек ба­ғасының тұрақтылығы мем­л­екет қадағалауына алын­ған. Яғни, дәріханалардағы дәрілік заттардың бағасы бекітілген шекті бағадан жо­ғары болмауы керек. Сондықтан медициналық өнімдердің тапшылығына немесе пайда табу мақса­тында оның құнын көтеруге еш негіз жоқ. Әсіресе, тө­тен­ше жағдай кезінде мұн­дай келеңсіздіктерге жол бермеу маңызды. Елімізде дәрілік заттардың бағасын реттеу заңына сәйкес мониторинг жұмыстары тұрақты түрде ұйымдастырылады. Соны­мен қатар тұрғындар тарапынан келіп түскен шағымдар бойынша да қадағалау жұмыстары жүргі­зілетінін айта кеткен жөн. Соңғы уақытта елдегі жария­ланған төтенше жағдайға байла­нысты «дәріханалардағы баға­ларға бақылау бола ма?», «бағалар аяқасты көтеріліп кетті», «анти­септик, маска, спирт, парацетамол және т.б. дәрі-дәрмектер жоқ», «маскалар 100-200, этил спирті 250-400 теңгеден сатылуда» деген әңгімелер жиі айтыла бастады. Сол себепті өңірлерде дәріха­налардағы дәрі-дәрмек бағасына мониторинг жұмыстары жүргі­зіліп, жағдайды барынша бақы­лауда ұстау міндеттелді. Қазақстандағы ең ірі мега­полис саналатын Алматы қала­сын­дағы 135 дәріхана ұйымының ішінде 5 дәріханада дәрі-дәрмек құны заңсыз көтерілгені анық­талды. Бұл туралы қалалық Тауар­лар мен қыз­меттердің сапасы мен қауіпсіз­дігін бақылау департа­ментінің басшысы Айзат Мол­дағасымова онлайн брифинг ба­рысында мә­лімдеді. Оның ай­туынша, Алматы бойынша ТЖ жағдайында әлеу­меттік маңызы жоғары 103 дәрілік заттың атауы тізімделген. – Бұл дәрілердің бағасын көтермеу жайлы қалалық әкімдік пен Тауарлар мен қызметтердің сапасы мен қауіпсіздігін бақылау департаменті, Фармацевтикалық қызметті қолдау мен дамыту қа­уымдастығының арасында мем­орандумға қол қойылған. Алматы әкімдігі мен департамент қыз­меткерлері қаланың 8 ауданында күнделікті бағаларға мониторинг жүргізіп жатыр, – деп атап өтті департамент басшысы. Ол сон­дай-ақ бетперделер бір адамға 10 данадан ғана сатылатынын, 3 қа­батты медициналық бетперденің бағасы 87 теңге екенін, ал сүзгіші бар бетперденің бағасы 111 теңге көлемінде бекітілгенін жеткізді. Ал жоғарыдағы жалпыға ортақ тәртіпті бұзған дәріхана ұйымы­ның басшысына хаттама толты­рылып, іс әкімшілік сотқа жол­данған. Аталған ұйым басшылары енді жазаға тартылып, 97 мың мен 235 мың теңге аралығында айып­пұл төлейтін болды. Нұр-Сұлтан мен Шымкенттегі дәріханаларға жүргізілген мони­торинг барысында бетперде мен гигиенаға арналған антисеп­ти­калық заттардың тапшылығы байқалып отыр. Таразда жұқпалы аурулардың алдын алатын, ин­фекциядан қорғанатын антисеп­тик және қолғап сынды заттардың жеткілікті екені анықталды. Мо­ниторинг жүргізілген өзге аймақ­тарға да дәрі-дәрмек бағасын шекті бағадан жоғары көтермеу туралы ескерту жасалды. – Қазір дүрлігуге негіз жоқ, сауда желілеріндегі барлық сө­релер толтырылған, бағалар тұ­рақты. Тұрғындарды маска және антисептикпен қамтамасыз ету бойынша медициналық маскалар мен вирусқа қарсы дәрі-дәр­мектерді қаланың дәріхана­ла­рында жеке және көтерме бағада қолжетімділігі бойынша ай са­йынғы мониторинг жасалады. Маска тапшылығы кейбір кәсіп­керлер мен жеке тұлғалардың маскаларды көтерме бағамен сатып алуына байланысты болып отыр. Сондықтан бір адамға 5 дана маскадан артық сатпауға шешім қабылданды, – дейді Нұр-Сұлтан қаласының әкімі Алтай Көлгінов Президент жанындағы Орталық коммуникациялар қыз­метінде жасаған баяндамасында. Бір қуанарлығы, дәріхана­лардағы маска мәселесі қазіргі кезде тұрақты жолға қойылды. Қалалық дәріханалар маскамен күнделікті қамтамасыз етіліп оты­рады. Бірақ фармацевт маман­дардың айтуынша, дәріханаларға таңертең әкелінген маскалар түс ауа таусылып қалатын көрінеді. Ал елде орын алған ахуалға бай­ланысты маскаға деген сұраныс күн сайын артпаса кеміген емес. Маскалардың бар-жоғын i-teka.kz/ интернет ресурсы арқы­лы көруге болады. Белгілі бір дә­рі­ханаларда масканың жоғы туралы шағымдарды оператор тіркеп, сол арқылы қала дәріха­наларын маскамен қамта­масыз ету бойынша жауаптыларға жыл­дам жағдайда ақпарат бере алады. Егер сіз медициналық мас­калар мен антисептик құралдарын сату кезінде бағаның негізсіз өсу фак­тісіне куә болсаңыз ҚМ Қар­жы мониторингі комитетінің 708-478, 316-145 сенім телефо­нына хабар­ласып, шағымыңызды жет­кізе аласыз. Сол бойынша коми­тет өкілдері тексеру жұмыс­тарын жүргізіп, жағдайды бақы­лауда ұстап отырады. Жалпы, елімізде күн сайын 80 200 маска шығарылады екен. Өндірушілер алдымен оны ме­дициналық мекемелерге үзіліссіз жеткізеді. Бұл туралы ДСМ «Дә­рілік заттар мен медициналық бұйымдарды сараптау ұлттық орталығының» бас директоры Арнұр Нұртаев мәлімдеді. – Ақпан айының басында сатылымда 9 миллионнан астам маска қоры болды. Бұл азамат­тарымызды ай сайын респира­торлық аурулардан қорғауға жет­кілікті болатын. Дегенмен ко­ронавирус инфекциясына бай­ла­нысты адамдар дәріханалардағы желілерден масканы арты­ғымен алуда. Соның салдарынан тө­тен­ше жағдай кезінде маскаға деген сұраныс 30 миллионға дейін жет­ті, – дейді Арнұр Нұртаев. Қазіргі таңда антисептик шы­ғаратын кәсіпорын да өз өнім­дерінің мөлшерін арттырып жа­тыр. Енді дәріханалардағы дәрі-дәрмек бағаларының тұрақты­лығы сақталып, көп реттік бет­перделердің қолжетімділігі мен бағасы бақылауда болса, жағдай да оңалар деген ойдамыз.  

   width=Абылайхан ЖҰМАШ