Палата спикері Нұрлан Нығматулиннің төрағалығымен өткен Мәжілістің кезекті жалпы отырысында депутаттар бірқатар жаңа заң жобаларын қарады.
Қалаулылар «Қазақстан мен Литва арасындағы бас бостандығынан айыруға сотталған адамдарды және медициналық сипаттағы мәжбүрлеу шаралары қолданылған адамдарды беру туралы шартты ратификациялау туралы» заң жобасын мақұлдады. Құжат Сенатқа жолданды.
Заң жобасының негізгі мақсаты – уағдаласушы мемлекеттердің бас бостандығынан айыруға сотталған адамдарды және медициналық сипаттағы мәжбүрлеу шаралары қолданылған адамдарды беру саласындағы ынтымақтастықты шарт ережелеріне және ұлттық заңнамаға сәйкес жүзеге асыру болып отыр.
Қазақстанның оны ратификациялауы – сотталған адамдардың және медициналық сипаттағы мәжбүрлеу шаралары қолданылған адамдардың азаматтық жағынан өз қоғамына, мысалы, Литвадағы осы санаттағы қазақстандықтардың елге оралып, жұртшылығымыздың қатарына қайта интеграциялануына септесетін болады.
Осы жиында Мәжіліс келіп түскен жаңа заң жобаларын жұмысқа қабылдап алды. Олардың арасында «Кейбір заңнамалық актілерге қаржы нарығын реттеу мен дамыту және микроқаржылық қызмет мәселелері бойынша өзгерістер мен толықтырулар енгізу туралы» және «Кейбір заңнамалық актілерге жұмылдыру дайындығы мен жұмылдыру мәселелері бойынша өзгерістер мен толықтырулар енгізу туралы» заң жобалары бар.
Жалпы отырыс соңында Мәжіліс депутаттары Бақытбек Смағұл, Кәрібай Мұсырман, Зәуреш Аманжолова, Роман Ким, Нұржан Әлтаев Үкіметке және құзырлы мемлекеттік органдарға депутаттық сауалдарын жолдады.