Бейрут бейбітшілік үшін риза

Мәжіліс төрағасы ливандық парламентшілерді Еуразия елдері парламенттері жетекшілерінің биылғы кеңесіне шақырды. Палата төрағасы Нұрлан Нығматулин Ливан Республикасының Қазақстандағы төтенше және өкілетті елшісі Жискар әл-Хуриді қабылдады.

Жүздесушілер қазақ-ливан ынтымақтастығын, соның ішінде, парламентаралық қарым-қаты­нас­ты дамытудың өзекті мәсе­ле­лерін талқылады. Мәжіліс спикері «Ливан – Қазақстанның Таяу Шығыстағы маңызды серіктесі» саналатынын және екі ел ара­сын­дағы қатынастар конструктивті диалог пен өзара түсіністік негі­зінде дамып келе жатқанын атап өтті.

Әңгіме барысында жаһандық бейбітшілік пен қауіпсіздікті ны­ғайту тақырыбына айрықша назар аударылды. Нұрлан Нығ­матулин Қазақстанның Тұңғыш Прези­денті – Елбасы Нұрсұлтан Назар­баев негізін қалаған бейбіт өмір басымдықтарын атай келе, еліміз халықаралық деңгейде де осы мәселелерге баса мән беретінін нықтады.

Нұрлан Зайроллаұлының байламынша, Сириядағы қақты­ғысты реттеуге бағытталған келіс­сөздерге алаң ұсынуы, қазақ­стан­дық бітімгершілік контингенттің Ливандағы БҰҰ-ның бейбіт­ші­лікті ұстап тұру миссиясына қа­тысуы – Қазақстанның жаһандық қауіпсіздікті қамтамасыз етуге қосқан үлесі болып отыр.

Кездесу кезінде қос мемле­кеттің парламенттері арасындағы өзара іс-қимыл мәселелері де әңгімеге арқау болды. Н.Нығ­ма­тулин ықпалдастықты дамытуға мүдделілік танытты.

Мәжіліс төрағасының ай­туынша, елордамыз Нұр-Сұлтан қаласында биылғы 23-24 қыр­күйекте, «Үлкен Еуразия: Диалог. Сенім. Әріптестік» тақырыбында өтетін Азия мен Еуропа елдері парламенттері спикерлерінің IV кеңесіне Ливан Ұлттық ассам­блея­сы делегациясының қатысуы, сондай-ақ палаталардың бейінді комитеттері мен ынтымақтастық жөніндегі топтар деңгейінде өзара сапарлар жасау –парламен­та­ралық серіктестіктің нығаюына септеседі.

Өз кезегінде елші мырза Қа­зақстан мен Ливан арасындағы қарым-қатынастар жоғары дең­гейде екеніне назар аударды және Бейруттың оны ары қарай кеңей­туге дайын екенін жеткізді. Жискар әл-Хуридің пікірінше, Ливан Қазақстанның халықа­ра­лық қауіпсіздікті нығайтуға үлесін және бітімгершілік бастамаларын жоғары бағалайды.