Қазақстандық фермерлер барлық құжаттары болған жағдайда блокпосттардан еш кедергісіз өте алады. Тиісті өзгерту Қазақстан Республикасының Бас мемлекеттік санитариялық дəрігерінің 2020 жылғы 14 сәуірдегі қаулысына енгізілді. Қаулының 1-тармағының 14-тармақшасы енді мынадай редакцияда жазылған: «Облыстың, қалалардың, аудандардың, ауылдық аймақтардың ішінде көктемгі дала жұмыстарын, табиғатты қорғау, ветеринариялық, ауыл шаруашылығы іс-шараларын жүргізуге, сондай-ақ растайтын мемлекеттік тіркеу куәлігін (шаруа қожалығы, фермерлік шаруашылық, жауапкершілігі шектеулі серіктестік, ауыл шаруашылығы тауарын өндіруші, кредиттік серіктестік және шаруашылық жүргізу құқығындағы мемлекеттік коммуналдық кәсіпорын), жеке куәлікті, сондай-ақ жұмыскерлер үшін жұмыс орнына анықтаманы (мөрмен куәландырылған еркін үлгідегі анықтама) ұсынған кезде ара шаруашылығында тартылған адамдардың көліктерін қоспағанда, жеке көліктің қозғалысын шектеуді қаулы етемін», – делінген құжатта. Қаулы 17 сәуірден бастап күшіне енеді.