Алматы облысында ауыл тұрғындары стационарды жабуды талап етіп шу шығарды
Алматы облысында ауыл тұрғындары стационарды жабуды талап етіп шу шығарды
© сурет интернеттен алынды
19 сәуірде сағат 00.15-те Қарасай ауданы Елтай ауылдық округіне қарасты Береке ауылында жергілікті тұрғындар ауылдағы дәрігерлік амбулаторияның алдына жиналды. Бұл туралы облыс әкімінің баспасөз қызметі хабарлады. Жиналғандар ауылдық медициналық мекеменің (амбулатория) коронавирус инфекциясымен ауырған азаматтармен қарым-қатынаста болғандарды оқшаулау үшін қолданылатын обсервациялық стационар ретінде пайдаланылуына өз наразылықтарын білдірді. Амбулаторияның ішінде пациенттер болмаған, бос тұрған. Тұрғындар арасынан бұзақылар шығып, ғимаратқа материалдық шығын келтірген (есік-терезелерін бұзып, 30 төсек пен матрац сыртқа лақтырылған). Жиналғандардың ішінде жекелеген адамдар алкогольдік ішімдікке мас күйінде болған - делінген хабарламада. Қарасай ауданының әкімі Жандарбек Далабаев жиналған тұрғындармен сөйлесуге келіп, түсіндіруге тырысқанымен ауыл тұрғындары әкімнің сөзіне қағаттанбай, обсервациялық стационарды жабуды талап еткен. Мұнан соң мас күйіндегі азаматтар Қарасай аудандық полция бөліміне жеткізілген. Осы оқиға бойынша Қарасай АПБ-да ҚР ҚК 202-бабының 1-бөлігіне сәйкес, яғни бөгденің мүлкіне қасақана зиян келтіру әрекеті бойынша қылмыстық іс қозғалды. Төтенше жағдай кезінде заңсыз әрекетті ұйымдастырып, бұзақылыққа бастағаны үшін кінәлілер қатаң жазаланады. Алматы облысының әкімдігі тұрғындарды көрінеу жалған ақпараттарға сенбеуге, тек ресми мәліметтерге ден қоюға шақырады - делінген әкімшілік таратқан ақпаратта. Тексерілмеген ақпарат көздерінен көрінеу жалған ақпарат таратқандар, осы тектес әрекеттерге жол бергендер ҚР заңнамаларына сәйкес жауапқа тартылады.