Жуырда әлеуметтік желіде карантин енгізілгеніне қарамастан көппәтерлі үйдің ауласында дискотека ұйымдастырып, билеп жүрген қарағандылық азаматтардың видеосы пайда болған. Видеода көрсетілген Майқұдық ауданындағы үйді тексерген полиция қызметкерлері карантин режимін бұзғандарды анықтады.
Қазіргі кезде музыканы қосып, басқаларды шақырған адам да табылды. Оған қатысты әкімшілік жаза ретінде 476-бап бойынша хаттама толтырылған. Яғни, азаматқа 10 айлық есептік көрсеткіш көлемінде айыппұл салынады немесе 15 тәулікке дейін әкімшілік қамауға алынады.
Бұдан бөлек, карантин кезеңінде ювеналды полиция қызметкерлері көшеде және қоғамдық орындарда 69 жасөспірімді ұстаған. Оның ішінде орта мектеп оқушысы – 54, колледж студенті – 12, университет студенті – 1, жұмыссыз 2 адам бар.
– Барлық осы факті үшін Әкімшілік құқықбұзушылық туралы кодекстің 476-бабына сәйкес (төтенше жағдайды бұзу) заң бұзушылардың заңды өкілдеріне қатысты әкімшілік хаттама толтырылды, – деп хабарлады қалалық Полиция басқармасы.
