Мемлекет басшысының карантин кезінде халықтың коммуналдық төлемдерін өтеуге көмектесу туралы берген тапсырмасына орай Алматы облысында нақты шаралар қолға алынды. Облыстық Энергетика және тұрғын үй-коммуналдық шаруашылық басқармасының басшысы Бағлан Тәнекенов бұл жайында жан-жақты айтты.
Еліміздегі төтенше жағдайға байланысты коммуналдық қызметтер үшін берілетін төлем сәуір мен мамыр айлары үшін төленеді және 15 мың теңге тұтынушылардың абоненттік есепшотына жіберіледі. Көмек коммуналдық қызметтерді жеткізушілер мен өз атынан шарт жасасқан, төтенше жағдайға байланысты карантин енгізілген елді мекенде тұратын негізгі санаттағы адамдарға көрсетіледі.
– Коммуналдық қызметті тұтынушының атында есепшот болса, коммуналдық қызметтер бойынша шығындар өтеледі. Облыс бойынша 248 мың 395 азамат коммуналдық қызметті тұтыну бойынша өтем алатыны анықталды. Жеті санат бойынша тіркелген азаматтардың бір айлық коммуналдық шығыны шамамен 15 мың теңгені құрайды. Аталған төлем үшін республикалық бюджеттен екі айға 7,5 миллиард теңге бөлінді. Облыс аумағында халыққа коммуналдық қызметті түрлі меншіктегі 138 мекеме көрсетеді дейді басқарма басшысы. Коммуналдық қызметтер бойынша өтемді алу үшін тұтынушы ешқайда сабылмастан, жеке сәйкестендіру нөмірін, әлеуметтік мәртебесін және есепшотының деректерін көрсету арқылы call-орталықтар мен ақпараттық жүйелер арқылы өтінім береді. Бүгінгі таңда жергілікті әкімдіктер өтінімдерді қабылдау үшін call-орталықтар мен ақпараттық ресурстар құру бойынша шұғыл шаралар атқаруда.
Болат АБАҒАН,
Алматы облысы
