ҚКХП-ның Қызылордада облыстық сайлауалды штабының жетекшісі Т.Телеубаев пен партиялық комитеттің белсенділері Қызылорда облысы денсаулық сақтау басқармасының «Облыстық медицина орталығында» медицина қызметкерлерімен кездесу өткізді.
Т.Телеубаев ҚКХП-ның ҚР Парламенті Мәжілісінде мемлекеттік деңгейде жұмысшы таптың мүддесін қорғау мүмкіндігі бар екенін айтты. Партия өкілдері әлеуметтік-экономикалық сипаттағы мәселелерді көтереді, соның ішінде депутаттардың медицина саласына қатысты көтерген мәселелеріне тоқталды. Елдегі кедейшіліктің шынайы деңгейін қайта санау керегін және бұл құбылысты өзекті әлеуметтік мәселе деп тану қажетін атап өтті.
«Қазақстанда ауқатты және өте ауқаттылардың саны өте көп. Мұнымен қатар кедейлік шегінде немесе оған жақын деңгейде өмір сүретін адамдардың саны артып келеді. Қазақстанның салық салу жүйесі байлар үшін елімізді жұмаққа айналдырып отыр. Бұл – әділетсіз!» – деді ол.
Қоғам әділетсіз табысқа көнбеуі тиіс. Біздің халықты, біздің экономиканы тонап жатқан адамдар қай жақта жасырынып жатса да, әділ сотқа берілуі тиіс. Орта тапты қозғамай, үстеме табысқа ие адамдарға табыс салығының жоғары мөлшерлемесін қолдану қажет.
«Бізден ұрланған капиталдарды халыққа қайтаруға мемлекет пен қоғамның бар күшін салатын уақыты жетті. Бұл салада заңнаманы күшейту және бұл күресте әлемдік қауымдастықтармен өзара ықпалдастықты жандандыру қажет. Халықтың ақшасы халық мүддесі үшін қызмет етуі тиіс. Барлық қашқын олигарх сотқа тартылуы тиіс!» – деп түйіндеді Телеубаев.
Спикер сөздерінен кейін кездесу қатысушылары көкейлерінде жүрген сұрақтарды қойды. Олардың басым бөлігі медқызметкерлердің жалақысын көтеру, баспанамен қамту, кадр тапшылығы төңірегінде болды.
Айдана БЕГІМ