Мемлекеттік қызмет істері және сыбайлас жемқорлыққа қарсы іс-қимыл агенттігінің Қарағанды облысы бойынша департаменті облыстағы колледждер мен ЖОО-да «Сыбайлас жемқорлыққа қарсы омбудсмен» жобасын жүзеге асыруда.
Колледждерде және жоғары оқу орындарында проблемалық, сондай-ақ ұсыныстар мен жобалар сияқты әртүрлі мәселелер бойынша өтініш білдіруге болатын омбудсмендер бекітілген.
«Сыбайлас жемқорлыққа қарсы омбудсмен» жобасының қызметі парақорлықтың алдын алу бойынша жұмыстар жүргізуге, жемқорлық тәуекелдерін талдауға, оқу орындарында мониторинг өткізуге, сондай-ақ студенттер мен оқытушылардан түйткілді мәселелері бойынша өтінімдер қабылдауға бағытталған.
Қарағанды политехникалық университетінің Сыбайлас жемқорлыққа қарсы омбудсмені Ердос Абдрахманов ЖОО студенттерімен және оқытушы-профессорлық құраммен кездесу өткізді.
Кездесудің басты мақсаты – сессия қарсаңында оқу орнында студенттердің, сондай-ақ оқытушылардың да тарапынан кез келген сыбайлас жемқорлық құбылыстарына жол бермеу.
– «Сыбайлас жемқорлыққа қарсы омбудсмен» жобасы студенттердің бойына сыбайлас жемқорлыққа қарсы мәдениетті және сыбайлас жемқорлыққа тұрақты иммунитет қалыптастыруға бағытталған. Сол себепті, студенттерді сессия кезінде сыбайлас жемқорлық тәуекелі туындаған кезде, дипломдық жұмысты сатып алуға ұсыныс түскен, сондай-ақ басқа да сыбайлас жемқорлық ахуалдары мен сыбайлас жемқорлыққа күдік пайда болған жағдайда бізге хабарласуға шақырамыз», – деп атап өтті омбудсмен Абдрахманов Ердос.
Ләззат ҚОЖАХМЕТОВА,
Қарағанды облысы