Үкімет басшысы Асқар Мамин елорданы жұмыс барысымен аралады. Оның барысында Премьер бас қаланың ірі көлік жобаларының, атап айтқанда Нұр-Сұлтан қаласының Оңтүстік-Батыс айналма автомагистралінің және LRT желісінің құрылысын тексерді.
Бұл жобалар астананың орнықты көлік инфрақұрылымын дамыту мақсатында іске асырылып жатыр. «Нұр-Сұлтан қаласының Оңтүстік-Батыс айналма жолы» жаңа автомагистралі елорданы дамытудың Бас жоспарында қарастырылған К-1 айналма жолының бөлігіне айналады. Ол ұзындығы 87 шақырым болатын қала маңындағы айналма жолды тұйықтайды.
Транзиттік көліктерге қала ішіне кірмей, оны оңтүстік-батыс жақтан айналып өтуге мүмкіндік беретін жаңа трассаның жалпы ұзындығы, 3 көпір мен 4 көлік жобасын қоса алғанда,
34 шақырымды құрайды.
Оның арқасында бұған дейін транзитпен өту үшін елорда көшелеріне кіріп кететін автокөлік құралдарының үлкен ағыны қала сыртына бағытталады. Бұл сондай-ақ ауыр жүк көліктерінің астананың ішкі жолдарын бүлдіруінің алдын алмақ. Әрі елордадағы көлік ағыны мен кептелісін азайтуға ықпал ететін көрінеді. Айналма трассалар үстіндегі қазіргі ағынның 50%-дайы алда оңтүстік-батыс айналма жолына ауысуы мүмкін деп болжануда. Жол бойында логистикалық орталықтар мен жолбойы сервисінің нысандары салынады.
«ҚазАвтоЖол» АҚ деректері бойынша осы нысан құрылысында 800-ден астам адам жұмыс істейді, 500-ге жуық техника тартылған.
Премьер-министрге барлық жоспарланған жұмыстың кестеге сай жүргізіліп жатқаны және биыл автожолдың барлық жерінде қозғалыстың ашылатыны баяндалды. Асқар Мамин атқарылып жатқан жұмыстардың мерзімі мен сапасын сақтау қажетіне мердігер ұйымдардың назарын аударды.
Үкіметінің басшысы қаланы аралау кезінде сонымен қатар Қабанбай батыр даңғылын айналма жолдан бастап, Нұрсұлтан Назарбаев халықаралық әуежайына дейінгі учаскеде реконструкциялау жоспарларымен танысты. 6,4 шақырым ұзындықтағы автожолдың бұл учаскесін алты жолақты ету көзделген. Жұмыстар 2020 жылы басталады. Қазіргі кезде техникалық-экономикалық негіздемесі және жобалық-сметалық құжаттамасы әзірленуде.
Бұған қоса, жеңіл рельсті көлік (LRT) жобасын салу жұмыстары жүргізіліп жатқаны мәлімделді. Үкімет жетекшісі жаңа көлік жүйесін жүзеге асыру барысына қанықты: оны 2020 жылдың екінші жартысында іске қосу жоспарланып отыр.
Сондай-ақ А.Мамин Ауыл шаруашылығы министрлігінде көктемгі-егіс жұмыстарын жүргізу барысына арналған жұмыс кеңесін өткізді. Оған мемлекеттік органдар басшылары, облыс әкімдері, ауыл шаруашылығы тауарларын өндірушілер, салалық қауымдастықтар мен одақтар өкілдері қатысты.
Кеңесте шаруаларды сапалы тұқымдармен, ЖЖМ-мен, ауыл шаруашылығы техникасымен қамтамасыз ету, сұранысқа ие ауыл шаруашылығы дақылдарының аудандарын әртараптандыру, субсидиялау мәселелері қаралды.
Ауыл шаруашылығы министрі Сапархан Омаров қазіргі кезде барлық өңір көктемгі егіс жұмыстарын жүргізуге кіріскенін, ал оңтүстік өңірлерде егіс жұмыстары аяқталуға тақап қалғанын айтты. Қазақстан биыл 22,3 миллион гектарға егін екпек. Соның ішінде көктемгі егіс аумағы 19 млн гектар болады. Дәнді дақылдар тек 14,5 миллион гектар алқапқа себіледі. Шаруалардың тұқымға деген қажеттіліктері 100% қамтамасыз етіліпті. Биылғы егінге шамамен 2,5 млн тонна тұқым әзірленген, бұл өткен жылғыдан 100 мың тоннаға артық.
Зиянкестер мен арамшөптерден қорғау мақсатында қажетті қоректік заттар мен өңдеуге арналған препараттар сатып алынғаны мәлімделді. Бүгінде 267,1 мың тонна тыңайтқыш жөнелтілген, оның 60%-ы – отандық өндірушілерден алынған.
2018 жылы ауыл шаруашылығы техникалары 3,5%-ға жаңартылды. Жалпы алғанда, жұмысқа 147 мың трактор, 4 мың бірлік өнімділігі жоғары егіс жиынтықтары тартылған.
Мемлекеттік қолдау шараларының аясында 50,6 миллиард теңге сомасына 1 770 ауыл шаруашылығы өндірушісі қаржыландырылыпты.
Өз кезегінде Энергетика министрі Қанат Бозымбаев шаруаларды жанар-жағармай материалдарымен қамтамасыз ету барысы туралы баяндады. Наурыз-маусым кезеңінде көктемгі дала жұмыстарын жүргізуге 380 мың тонна дизель отыны бөлінді. Бүгінде қажеттілік көлемінің 81%-ы жөнелтілген. Энергетика министрлігі белгілеген дизель отынының бағасы литріне 160 теңгені құрайды, операторлардың жеткізу бағаларын қосқанда, өңірлердегі литрі үшін орташа бағасы 174 теңгеден басталады. Бұл нарықтық бағадан 18 теңгеге арзан көрінеді.
Түркістан, Алматы, Жамбыл облыстары басшыларының және солтүстік өңірлер – Ақмола, Қостанай, Солтүстік Қазақстан облыстары әкімдерінің өңірлерде егіс науқандарын жүргізу туралы баяндамалары тыңдалды. Барлық өңір тұқымдардың қажетті көлемімен қамтамасыз етілгенін, ЖЖМ жеткізуде мәселе жоқтығын баяндады.
Кеңесті қорытындылаған Премьер Асқар Мамин егіс науқанының қанағаттанарлық қарқынын атап өтті.
«Егіс жұмыстарын оңтайлы агротехникалық мерзімде ұйымдастырып, аяқтау – басты мәселе», – деп нықтады Үкімет басшысы.
Елдос СЕНБАЙ