Шаштараз, ателье, құрылыс базарлары жұмысын жандандырады – Түркістан облысы
Шаштараз, ателье, құрылыс базарлары жұмысын жандандырады – Түркістан облысы
Бүгіннен бастап Түркістан облысында карантин режимі жеңілдетілді. Атап айтқанда, өңірде  барлық санитарлық нормалар мен санитарлық талаптар сақталып, химиялық тазалау, кір жуу, кілем тазарту нысандары, сән салондары, шаштараз сынды басқа да халыққа қажетті тұрмыстық нысандарға жұмыс істеуге мүмкіндік берілді. Бұл жағымды жаңалықты облыс әкімінің орынбасары Сакен Қалқаманов онлайн-конференцияда мәлімдеді. Алайда, іске қосылған кәсіпорындар мен нысандар нормалар мен талаптарды сақтамаса, онда оларға заңға сәйкес қатаң шаралар қолданылып, қызметі шұғыл тоқтатылады. Сәкен Қалқаманов Сәкен Амангелдіұлының айтуынша, азаматтар қызмет көрсету орындарына алдын ала жазылу арқылы бес адамнан аспайтындай ретпен  барулары қажет. Сондай-ақ, тұрмыстық жөндеу орталықтары (оның ішінде кеңсе техникасы, мобильді құрылғылар) жеткізу қызметін көрсететін болады. Автожуу, дөңгелек ауыстыру, май ауыстыру орталықтары, токарлық, дәнекерлеу цехтары, жиһаз цехтары, ателье, киім мен аяқ киімді жөндеу, кәсіпорындар, құрылыс базарлары мен дүкендері де өз жұмыстарын бастайды. Екінші деңгейлі банктер, «Қазпочта» бөлімшелері мен көктемгі егін егу жұмысы үшін несие беретін микроқаржы ұйымдары, ломбардтар және айырбастау пункттері қызметіне кіріссе, асханалар мен тамақтану орындары 8.00-22.00 дейін тамақты онлайн тапсырыс арқылы даярлап, жеткізу қызметін атқарады. Азық-түлік сататын көтерме сауда орындары мен дүкендер,  дезинфекциялық режимді сақтай отырып жұмыс істесе, дәріхана, қонақүйлер, нотариустар, адвокат кеңселері, күзет қызметі де қызметіне кіріспек. Сауда саласы бойынша көшеттер, пестицидтер, тыңайтқыштар, бау-бақша өнімдерін сататын дүкендер, жүк көліктері мен ауылшаруашылық және құрылыс техникалары арналған дөңгелектер мен автомобиль бөлшектерін сататын дүкендер мен қоймалар, оптика, автосалондар да өз сатып алушыларын күтеді. Бұдан бөлек, тұрғындарға саяжайлар мен бау-бақшаларына сағат таңғы 6:00-ден 21:00-ге дейін Рұқсатнама (пропуск) жүйесіне сәйкес баруға рұқсат етіледі. Олар өздерімен бірге саяжай немесе бақша меншігін растайтын құжаттарын алып жүруі қажет. Барлық іске қосылған өнеркәсіп кәсіпорындарында, құрылыс, жол құрылысы және көлік компанияларында, банктерде, сауда нысандарында күнделікті дезинфекциялау жұмыстары жүргізіледі. Санитарлық нормалар мен санитарлық қауіпсіздік талаптары сақталмаған жағдайда, заңға сәйкес қатаң шаралар қолданылады немесе сол мезетте кәсіпорын немесе іске қосылған объектілер қызметі шұғыл тоқтатылады.

Тельман БЕЙСЕНОВ, Түркістан облысы.