Коронавирус пандемиясына байланысты уақытша тоқтап тұрған чемпионаттардың қай кезде жалғасатыны белгілі бола бастады. Футбол жанкүйерлері асыға күтіп жүрген үздік лигалардың көпшілігі жазда қайта жанданып, жанкүйерлері мен жасыл алаңын сағынған футболшылар сүйікті ісімен қайта қауышатын күн жақын. Қазақстан Футбол федерациясы мен Кәсіпқой футбол лигасы басшыларының біріккен жиынында футболдан барлық деңгейдегі Қазақстан біріншілігінің қашан жалғасатыны нақтыланды. Алайда дәл қай күні басталатынына қатысты ешқандай шешімге келген жоқ. Тек спорт шенеуніктері маусым айының ішінде басталатынын алға тартып отыр. ҚФФ-ның бас хатшысы Азамат Айтхожин, КФЛ президенті Олжас Абраев және департамент жетекшілері жарысты жалғастырудың алдын ала жоспары мен басқа да ортақ жобаларды талқылап, бірлесе шешім қабылдады. Жиында ел біріншілігін жалғастырудың екі нұсқасы қаралды. Негізгі нұсқасы ретінде біріншілікті екі айналым бойынша өткізу таңдалды. Қосымша нұсқасы ретінде биылғы доп додасын «күз-көктем» жүйесі бойынша ұйымдастыру жоспарланды. Қазақстан кубогы, Бірінші және Екінші лига командалары арасындағы біріншіліктерді өткізу осындай нұсқалар бойынша жүргізіледі. Қазақстан Футбол федерациясының Футзал департаментінің директоры Асқар Әбілдаев Instagram желісіндегі тікелей эфирде біріншілікті алдын ала аяқтау жоспарда жоқ екенін, себебі Чемпиондар лигасына кім баратынын анықтау міндеті тұрғанын айтты. Ал Қазақстан футбол федерациясының бас хатшысы Азамат Айтқожин пандемия басталғалы бері Қазақстан Футбол федерациясының жетекшілері ФИФА, УЕФА және ҚКФЛ жетекшілерімен жиі кеңесіп отырғанын тілге тиек етті. – Қазақстандық жанкүйерлерді біздің құрама мен клубтық командалар ойындарының қалай жалғасатыны қызықтырып отыр. OLIMPBET-Қазақстан чемпионаты мен кубоктық ойындардың, Бірінші және Екінші лиганың кездесулерін өткізу жөнінде де әртүрлі нұсқалар қарастырылуда. Карантин аяқталғаннан кейін ішкі турнирлердің қатысушыларына жарысты жалғастыру жөнінде хабарлама жіберіледі. Командалар мен төрешілер екі апта оқу-жаттығу жиынын жүргізу мүмкіндігін алады, – дейді ол. Айтпақшы, чемпионат көрерменсіз өтеді. Алдағы уақытта үшінші тур матчтарының күнтізбесі қайта жасалып, алдағы барлық турдың күндері жаңартылады. Бірінші лига клубтары арасында да чемпионатты бастау жоспарланып отыр. Клубтар екі айналымнан ойнайды – бір аптада 2 матч, содан кейінгі келесі аптада 1 матч. Екі аптада барлығы – 3 матч өтеді. Осылайша, олар жарысты қазан айының соңында аяқтамақ. Екінші лига чемпионатына келетін болсақ, жаңа маусымда турнирге бірден 22 команда қатысады деп күтілуде. Лиганың әкімшілігі чемпионатты екі конференцияға – «Оңтүстік – Батыс» және «Солтүстік – Шығыс» деп бөліп, әр конференцияда 11 командадан тұратын нұсқаны ұсынды. Матчтарды өткізудің басым нұсқасы жұптастырылған схемаға сәйкес болады. Бұл жағдайда чемпионатты 22 қыркүйекте аяқтауға болады. Конференция жеңімпаздары Бірінші лигаға өту құқығын алады. Қазақстан кубогының іріктеу ойындарына күнтізбенің тығыздығына байланысты Премьер-лигадағы командалар ғана қатысады деп күтілуде. Ал УЕФА Чемпиондар лигасы мен Еуропа лигасының іріктеу кезеңіне қатысатын 4 клуб (Астана, Қайрат, Ордабасы, Қайсар) жарысты Қазақстан кубогының 1/4 финалынан бастайды.
Үздік лигалар қандай шешім шығарды?
Әлемдегі үздік чемпионаттар да ішкі біріншіліктеріне қатысты нақты шешім қабылдап жатыр. Ағылшын Премьер-лигасы наурыздың ортасында тоқтатылып, мамырдың басында жалғасады деп жоспарланған. Бірақ елдегі эпидемиологиялық жағдайға байланысты чемпионаттың басталуы маусымға қалды. Англиялық басылымдардың хабарлауынша, маусымның қалған бөлігі 8 маусымда басталып, 27 шілдеде аяқталады-мыс. Ал келесі маусым 22 тамызда басталады. Бұған дейін командалар 9 мамырдан бастап жаттығуға оралатыны айтылған болатын. Әзірше ағылшын футболының басшылары чемпионаттың қашан басталатыны туралы ресми мәлімдеме жасамады. Белгілісі, АПЛ клубтары 1 мамырда онлайн жиналыс өткізіп, маусымды жалғастыру мәселесін шешеді. Испания футболы да жаздың басында қайта оралады. Испанияның премьер-министрі Педро Санчес таяуда брифинг кезінде кәсіпқой спортшылардың жағдайы туралы айтты. – Кәсіпқой спортшылар 4 мамырдан бастап жекелей жаттыға алады. Спорт саласында жаттығу орталықтарын гигиена және қорғаныс шараларын сақтап ашу қарастырылған, – деді Санчес. Футболшылар 18 мамырда аз-аздан жаттығатыны, 1 маусымнан бастап толыққанды жаттығуға кіресе алатыны хабарланды. Сондай-ақ Ла Лига басшылығы 5 маусымда чемпионатты көрерменсіз жалғастыратынын хабарлады. Ла Лига президенті Хавьер Тебас футболшылар алаңға шығудан бас тартса, жазаланатынын айтып отыр. Бір қызығы, Италиядағы Серия А лигасының қашан жалғасатыны туралы әлі мәлімет жоқ. Бірақ лига кеңесі чемпионаттың міндетті түрде жалғасатынын хабарлаған. Ал германиялық dfl.de сайты Бундеслиганың мамырда оралатынын жазды. Daily Mail мәліметі бойынша, Германияда футбол чемпионатын 9 мамырда бастау жоспарланды. Бұл футбол жанкүйерлері үшін қуанышты жаңалық болды. Жоспар бойынша стадионға тек 300 жанкүйер ғана кіре алады. Футболшылар ойын алдында командалық суретке түспейді, қол алыспайды. Әр футболшының жеке бөтелкесі болады. Ойыннан кейін командалар стадионнан әртүрлі уақытта кетеді.Бірқатар чемпионат мерзімінен бұрын аяқталды
Франция билігі қыркүйекке дейін спорттық шараларды өткізбеу туралы шешім қабылдады. Францияның премьер-министрі Эдуар Филипп Ұлттық жиналыста 2019-2020 жылғы спорт маусымы аяқталғанын хабарлады. Сол себепті футболдан Франция чемпионаты орта жолдан тоқтатылды. Франция футбол федерациясының президенті Ноэль Ле Гре де елде футбол маусымы аяқталғанын растады. Чемпионатының бітуіне әлі 10 тур бар болатын. Енді келесі маусымда Чемпиондар лигасында ПСЖ, «Марсель» мен «Ренн» өнер көрсетеді. Ал «Лилль» мен «Реймс» Еуропа лигасына жолдама алды. Франция чемпионаты Еуропада футбол маусымын орта жолдан аяқтаған алғашқы чемпионат емес. Бұдан бұрын Нидерланд чемпионаты маусымды аяқтайтынын хабарлаған. Чемпионаттың 25-турынан соң көш басындағы қос команда «Аякс» пен «АЗ Алкмаар» келесі маусымда Чемпиондар лигасында ойнайтын болды. Одан кейінгі орындарға жайғасқан «Фейеноорд», ПСВ мен «Виллем ІІ» Еуропа лигасында бақ сынайды. Бұдан бөлек, футболдан Мексика мен Аргентина чемпионаты да мерзімінен бұрын аяқталды. Өзге де мемлекеттерде футбол маусымын жалғастыру немесе жалғастырмау туралы нақты шешімдер қабылданып жатыр. Олар алдағы уақытта ресми түрде жарияланады. Ал біз үшін ең қуаныштысы Қазақстан футболының жанкүйерлермен қайта қауышуы болды.