Орталық коммуникациялар қызметінде Қазақ күресі федерациясының президенті Арман Шораев, Мәдениет және спорт министрлігінің Спорт және дене шынықтыру істері комитетінің төрағасы Серік Сәпиев, ORDA INVEST корпорациясының Басқарма төрағасы Шалқарбек Талипов және Ұлттық Олимпиада комитеті Спорт дирекциясының директоры Елсияр Қанағатовтың қатысуымен баспасөз мәслихаты өтті.
Айта кетейік, Қазақ күресі федерациясы және «Қазақстан барысы» қазақ күресін дамыту қоры ұйымдастыратын спорттық сайысқа Nur Otan партиясы, «Самұрық-Қазына» ұлттық әл-ауқат қоры, Мәдениет және спорт министрлігі, Нұр-Сұлтан қаласының әкімдігі қолдау көрсетеді. Дәстүрлі шара ұлттық спорт түрлерін дамыту арқылы салауатты өмір салтын қалыптастыру қағидаттарын насихаттау, жастарды ұлттық спорт түрлерімен шұғылдануға тарту арқылы олардың бойында отансүйгіштік сезімді қалыптастыру, қазақ күресін өркендету, оны ұлттық идея деңгейіне және халықаралық аренадағы беделін көтеру мақсатында жыл сайын өткізіліп келеді.
БАҚ өкілдерімен кездесу барысында «Қазақстан барысы» турнирін ұйымдастырушыларға журналистер өз сауалдарын қойып, нақты жауап алды. Қазақ күресі федерациясының президенті Арман Шораевтың айтуынша, Нұр-Сұлтан қаласындағы «Барыс Арена» мұз сарайында болатын дүбірлі додаға еліміздің 14 облысынан және күштік құрылымдар арасындағы турнирде іріктеуден өткен 36 үздік балуан қатысады. Ресми салмақ өлшеу рәсімі 6 маусымда, ал 8 маусым күні балуандар жеребе тарту бойынша жарыс жолына шағады. Тартысты белдесулер жеті сағатқа созылады деп жоспарлануда. Шара аясында спорттық сайыстармен қатар концерттік бағдарлама қойылады.
– «Қазақстан барысы» турнирінің биылғы жүлде қоры қомақты. Жеңімпаз атанған балуанға алтын белбеу мен алтыннан құйылған ауыспалы «Тайтұяқ» табысталады. Екінші және үшінші орын иегерлері сәйкесінше күміс және қола белбеулермен марапатталады. Сонымен қатар балуандардың әр белдесудегі жеңісіне 100 000 теңге беріледі. Жарыстың жүлде қоры – 41 миллион теңге. Ең негізгісі, жеңімпаз балуан 25 миллион теңгеге ие болады. Сондай-ақ бұл күні жылдағы дәстүрге сай жанкүйерлер арасында автокөлік ойнатылады, – дейді А.Шораев.
Турнирді өткізуге көптеген бизнесмен-меценат қолдау білдіріп отыр. Басқосуда ORDA INVEST корпорациясының басқарма төрағасы Шалқарбек Талипов әртүрлі федерациялармен бірге Қазақ күресі федерациясына да алдағы уақытта қолдау көрсетілетінін атап өтті.
Өз кезегінде Ұлттық Олимпиада комитетінің спорт дирекциясының директоры Елсияр Қанағатов Ұлттық олимпиада комитеті де ұлттық спортты қолдайтынын жеткізді.
– «Қазақстан барысы» жобасын жыл сайын үлкен қолдауға ие болып келеді. Соның арқасында қазақ күресі де өркендеп, даму үстінде. Жақында Ұлттық олимпиада комитетінің төрағасы Тимур Құлыбаев Лозаннада Халықаралық күрес федерациясының басшысымен кездесіп, Халықаралық Қазақ күресі федерациясын мүшелікке енгізу мәселесін көтерді. Менің ойымша, бұл жақсы бастама. Келешекте де Ұлттық олимпиада комитеті «Қазақстан барысы» турниріне қолдау көрсете береді», – деді ол.
Әбілмансұр ЖАСАН