Республикалық штабтың Алматы қаласындағы сапары жалғасын тапты. Кездесудің екінші күні қоғам қайраткерлері мен зиялы қауым өкілдерімен жүздесуден басталды.
Штаб мүшелері Елбасы ұсынған кандидаттың тәуелсіздіктің алғашқы жылдарынан бастап, ел мүддесі үшін атқарған қызметтеріне және оның сайлауалды бағдарламасының негізгі түйініне тоқталды.
– Қасым-Жомарт Тоқаев – тәуелсіздікті нығайтуға, мемлекеттің дамуына үлес қосып келе жатқан мемлекет қайраткері. Ол еліміздің Үкімет басшысы, Сенат төрағасы сияқты жауапты қызметтерден бөлек, Қазақстан тарихында алғаш рет Біріккен Ұлттар Ұйымы Бас хатшысының орынбасары сияқты лауазымды қызметті де абыроймен атқарды. Қазақстанда экономика, заң шығару қызметі, ішкі-сыртқы саясатты білетін, әлемдік деңгейде мойындалған мамандар көп емес. Солардың бірі – Қасым-Жомарт Кемелұлы. Сондықтан Елбасымыз ең жоғары лауазымды қызметке Қасым-Жомарт Тоқаевты лайық деп ұсынды, оны партиямыз бірауыздан қолдады , – деді штаб жетекшісі Мәулен Әшімбаев.
Еске салайық, 31 мамырды Қазақстанда саяси қуғын-сүргін және ашаршылық құрбандарын еске алу күні деп белгілеу туралы Елбасы жарлығы 1997 жылы шықты. Әрбір азамат «30-шы жылдардағы қуғын-сүргін мен алапат аштық елімізде енді ешқашан қайталанбаса» деп тілейді. Бұл туралы Алматыдағы ғылыми және шығармашылық зиялы қауым өкілдерімен кездесу барысында Республикалық қоғамдық штаб жетекшісі Мәулен Әшімбаев айтты.
– Бүгін бүкіл ел болып саяси қуғын-сүргін және ашаршылық құрбандарын еске алу күнін атап өтіп жатырмыз. Мұндай зұлмат енді қайталанбасын, келешек ұрпақ ондай ауыр кезеңді бастан өткермесін. Ал әділдік салтанат құруы үшін елде заң үстемдігі болуы тиіс. Қасым-Жомарт Кемелұлы өз бағдарламасында көрсеткен «Әділдік» қағидасының негізі де осы, – деді ол.
Айдана БЕГІМ