Әміре боп жеткен ән
Әлем демекші, әуелде қазақ музыкасы Әміренің дауысымен әлемге жетті. Париж төрінде Қашаубаев ән салғанда зал дүр сілкініп сала берді. 1925 жылы Парижде өткен Бүкіл дүниежүзі сән өнері көрмесінде «Ағаш аяқ», «Қанапия», «Үш дос», «Жалғыз арша» және т.б әндерді орындап, Әміре 2-орын алған еді. Қазақтың аса дарынды, талантты әншісінің дауысына париждіктер таңдай қаққан. Сол жолы Әміренің кеудесінде күміс медаль жарқырап, еліне абыроймен оралған. «Париж апталығы» газеті мен «Ле мюзикль» журналы Қашаубаевтың сирек кездесетін талант екенін жазып, таңдай қаққан. Сарбонна университетінің профессоры Перно фонографқа Әміренің орындауында бірнеше ән жазып алған. Осылайша, Әміре Қашаубаев шет елде өнер көрсетіп, қазақ елін танытқан тұңғыш әнші ретінде тарихта қалды. Әміренің орындауындағы әндер музыка зерттеушісі Жарқын Шәкәрім ағаның арқасында араға жылдар салып, елімен қайта қауышты.
«Алтын Орфейдің» иегері
Әміреден кейін ерекше дауысымен көпшілікті тәнті еткен әншінің бірі – Қазақстанның Еңбек Ері Роза Рымбаева. Қаршадай ғана қара қыз 1976 жылы «Алтын Орфей» байқауында Сейдолла Бәйтерековтің «Әлия» патриоттық әнін айтып, көпті тамсантқан еді. Ол кездері Роза халықаралық байқауларда Кеңес Одағының атынан өнер көрсеткен жалғыз қазақ әншісі болды. Қазақстанда, жалпы ТМД елдерінде Розаның ғажайып даусын естімеген жан кемде-кем. Оны көпшілік «Орта Азия бұлбұлы» санаса, енді біреулер «Қазақстанның алтын дауысына» теңейді. 1979 жылы әнші Стамбұлдағы халықаралық әншілер байқауында лауреат атанып, 1983 жылы Кубада өткен «Гала-83» халықаралық байқауында бас жүлдені жеңіп алады.
Дүние дидарындағы Димаш
Араға ғасыр салып, әлем Әміре Қашаубаевтан кейін Димаштың әніне елтіді. Бүгінде Димаш Құдайберген есімі шарықтап кетті. «Таңғажайып» десіп, таңдай қағып жатқандар қаншама! Оның жалпақ жұртқа танылуы Қытайдағы әйгілі әлемдік байқаудан басталғаны белгілі. HunanTV телеарнасының Singer 2017 жобасында екінші орын алған Димаштың орындауындағы «Дайдидау» әні әлемнің ең таңдаулы әндерінің қатарына кірді. Әні де, сәні де келіскен қазақ дарынының әндері бірінші, екінші орындардан түскен жоқ. Әлемнің әйгілі әншісі Лара Фабианның өзі құттықтап, парақшасына жазды. Әлемге әйгілі киножұлдыз Джеки Чан Димашты өзі іздеп келіп, арнайы құрмет көрсетті. Сыпайы ұлға сый-сияпатын көрсетті. Димаш та ұлттық дәстүрмен Джекидің иығына шапан жапты. Димаштың анасы Света Айтбаева бір сөзінде «14 турдан тұратын байқаудың ортасына дейін жетсе, жақсы болар еді» деген ойда болғанын айтқан еді. Ал аламан бәйгенің қорытындысында Димаш миллиардтар елінде екінші орынға ие болды. Бұл байқау оның атын әлемге әйгілі етті. Елдің бәрі Ұлы даланың дарабоз ұлын асқақтатып әкетті. Әлемнің әр түкпірінде Димаш деп қол соғатын жандар жетерлік. Тіпті, Димаштың тілінде сөйлеп, ән айтқысы келетіндер қаншама! Оның әні жүректен- жүрекке жетіп жатыр.
Мәскеуде ән салған Назима кім?
Назиманың әуелде Ресейдегі ТНТ арнасы ұйымдастырған «Песни» жобасына қатысамын деген ойы болмаған секілді. Аяқ астынан шешіліпті. Оның тіпті Мәскеуге баратын қаражаты да болмапты. Бір сұхбатында Назима: «Ән айтып, табыс тауып жүрген мейрамханадан мені шығарып жіберді. Ары қарай не істейтінім белгісіз болып жүргенімде, Жаратушының өзі мені осы жобаға әкелген сияқты. Бір банкетке ән айтуға барғанымда, жақын досым Instagram желісі арқылы осы сайыс туралы ақпаратты көрсетіп, «қатысып көргің келмей ме?» деп сұрады. Қарасам, өтініш жіберуге бір күн ғана қалыпты. Қатысуға ең соңғы болып өтініш бергендердің бірі болдым. Қалтамда қаржым да жоқ. Бірақ маған Гүлжан әпкем қолдау көрсетті. Ол кісі жол шығынымды өзі көтеріп алатынын айтып, «байығанда қайтарасың» деген еді», – дейді. Осылайша, «Песни» жобасы Назиманы Мәскеуге танытты. Ресейге танымал болған әнші қазір Мәскеуде тұрады. Ол үнемі «Қазақ болғанымды мақтан тұтамын. Менің Отаным – Қазақстан» деп жиі айтып отырады.
Данелия мен Максим
Данелия Тулешова да, Максим Ержан да дарынды жас таланттар. Данелияның жасы – 14-те. Оны танымал еткен – украиналық «Голос. Дети» музыкалық жобасы. Одан кейін балаларға арналған «Еуровидение» байқауына қатысты. 2019 жылы америкалық The World’s best таланттар шоуына қатысып, бақ сынады. Максимнің де есімі қазір елге белгілі.
13 жастағы өрен «Еуровидение» балалар байқауына қатысып, екінші орынды иемденді. Талантты баланың дарынын әлем мойындап қойған. Максим мен Данелия бағындырар биіктері әлі алда. Олар әлі талай әлемдік додаларда бақ сынайтыны анық. Бастысы, талмай еңбек ете білсе болғаны.
P.S.
Әміре Қашаубаевтан басталған жол Роза, Димаш, Назималарға жалғасты. Оны Данелия мен Ержан жалғады. Қазақта талантты жастар өте көп. Бұл – Құдай берген құбылыс! Димашы, Данелия мен Ержаны бар қазаққа Алла әлі талай дарынды беретініне сенейік! Әлемге аты озған әншілердің бағы жана берсін!
Гүлзина ТҰРҒАНБАЙҚЫЗЫ