Төлеби ауданындағы Қасқасу өзені тасып, жұртты әбігерге түсіріп жатқанда, Қазығұрттағы Жігерген ауылдық округте де жауған мол жаңбырдың нәтижесінде су тасқыны орын алып, 30 үйдің ауласына су кіріп, 2 қора құлады. Қазығұрт ауданы әкімдігінің баспасөз қызметінің мәліметінше, кеше кеште, яғни 2020 жылғы 13 мамыр күні 19:30 сағат шамасында Өрт сөндіру бөлімінің байланыс торабына Жігерген ауыл округтері тұрғындарынан үйдің ауласына жаңбыр суы жиналғаны туралы хабар келіп түсті. Оқиға орнына Қазығұрт ауданы Төтенше жағдайлар басқармасы мен аудан әкімдігі қызметкерлері шығып Жігерген ауыл округі бойынша 30 үйдің ауласына су кіргені, 2 қора құлағаны белгілі болды. Аталған оқиға орнына өрт сөндіру бөлімінің 30 қызметкері аудан, ауыл әкімдігінен 15 қызметкері 6 техника және 5 мотопомпамен үй аулаларынан су шығару жұмыстарын жүргізуде. Орын алған жағдайлар бойынша зардап шеккендер жоқ. Келтірілген залал шығындары есептелуде.
Тельман БЕЙСЕНОВ