Тараздағы Назарбаев Зияткерлік мектебінің 12-сынып оқушысы Дайана Бестерековаға әлемнің үздік инновациялық жоғары оқу орнының бірі Минерва университетінен (Minerva Schools at KGI) шақырту алды.
Университеттің грантын жыл сайын талапкерлердің 1-2 пайызы ғана ие бола алады. Солардың бірі – Дайана Бестерекова.
Енді тараздық оқушының 4 жыл ішінде 7 мемлекетте білім алып, саяхаттауға мүмкіндігі бар.
Талапкер 1-курсты Сан-Францискода оқыса, 2-курстан бастап Сеул, Гидробад, Буэнос-Айрес, Берлин, Лондон және Тайпейде оқитын болады. Оқу ордасының басты ерекшелігі – осында. Студенттер ел аралап жүріп, білім мен тәжірибе жинақтайды.
«Минерва университетіне оқуға түсуге талап өте жоғары. Шақыру қағазы келгенде қатты таңқалдым. Бала күнімнен әлемді аралап, түрлі мәдениет пен салт-дәстүрдің куәсі болуды армандайтынмын. Сондықтан Минерва мен үшін сапалы біліммен қатар, баға жетпес тәжірибе алуға мүмкіндік беретініне сенімім мол», – дейді Д.Бестерекова. Дайана болашағын қоғамдық ғылымдар мен бизнеске арнағысы келеді. Шетелден оралған соң, елдегі әлеуметтік бизнес саласын дамытуды көздейді.
