Білім және ғылым министрі ашықтық саясатын қолдайтынын сан мәрте айтты. Биыл өткен министрліктің алқа отырысында да А.Аймағамбетов «Біз барынша ашықтықты қолдаймыз» деген болатын. Бірақ облыс пен аудандағы білім бөліміне сауал қойып, нақты жауап ала алмай жүрген мұғалімдер аз емес.
«Ашықтық, бақылау мен есеп – жемқорлықпен күресудің жолы». Бұл тәмсіл қоғамның қозғаушы күшін айқындап берді. Бақылау бар жерде жүйе боларын, есеп сұралған мекемеде жұмыс жүретінін, ал ашықтық сенімнің іргетасы екенін көрсетті.
Білім және ғылым министрі Асхат Аймағамбетов барынша ашықтық саясатын ұстанып, білім жүйесінің бұған бірте-бірте «еті үйреніп» келеді. Бірақ әлі де біреу сын айтса көз аларта қарап, жауап бере алмай жалтаратындар бар. Мәселен, Н.Киікбаев атындағы мектеп-гимназия мұғалімі Айнұр Жамалбекқызының айтуынша, түйткілді мәселе төңірегінде сауал қойса, білім басқармасы өкілдері басын ала қашады.
«Білім бөлімдерінің басқарма басшылары өзекті проблема жөнінде нақты сұрақ қойсаң, жалпылама жауаппен құтылады. Тағы да тереңірек сұрақ қояйын десең, жауап беруге құлқы жоқ. Сөздің ашығы, аңшыны көрген аңдай орманға қашады. Жалтарып, сұрағыңа қатысы жоқ ойына түскен жауабын береді. Кімнен қашатыны түсініксіз. Аң кім, аңшы кім, сол жағын түсіне алмай жүрміз. Бұрынғы бюрократия әлі де бар. Министр толығымен болмаса да, біртіндеп жойып келеді. Күрмеуі көп мәселе болғандықтан, әлі де күту қажет», – дейді Айнұр Жамалбекқызы.
Белсенді ұстаз Айман Сағидулла да әріптесінің айтқанымен келіседі. Мұғалімнің айтуынша, облыс пен аудандық білім басқармаларының басшылары министр айтқандай ашық емес. Мұғалімдермен қарапайым түрде сөйлесе алмайды. Ұстаз олардың өзін өзгеден үстем ұстайтынын айтты. Министр ғана ашық саясатты ұстанып, мұғалімдермен емен-жарқын сұхбаттасатынын жеткізді.
Атырау облысы Қызылқоға ауданында білім беретін ұстаз Айгүл Төрешқызы да Білім басқармасына наразы екенін атап өтті. «Бізде ашықтық жоқ. Ауданда ешкім білім басшыларына пікірін ашық айта алмайды. Ашық пікір айтқаным үшін бірнеше рет жиналысқа салды. Соттасқан кезім де болды. Шындық айтатын мұғалімнің соңына түсіп, қалай да қысым көрсетуге тырысады. Facebook парақшасына сұрақ қойсаң, жауап бермейді. Парақшасы жақында ашылған. Көпке дейін достық қабылдамай жүрді», – дейді Айгүл Төрешқызы.
Осыған орай, ашықтық саясаты жөнінде Алматы облысы Білім басқармасына сауал жолдадық. Басқарманың баспасөз хатшысы Інжу Заманбекқызының айтуынша, басқарма басшысы Майгүл Тлеутауқызы халықты қабылдау күнінде барлық сұраққа рет-ретімен жауап береді. Әрі басқармада Call-орталық жұмыс істейді. Орталыққа мұғалім мен ата-ана кез келген уақытта хабарласып, сауал қойып, жауап алады. Мұғалімдермен кездесуде олардың ойын барынша ашық айтып, өзекті мәселелерге баса назар аударады екен.
Министр білім саласы қызметкерлерінің сұрағына толыққанды жауап беруге тырысады. Осыған дейін бірнеше тікелей эфир, бейнеконференция өткізді. Аппаратта өткен жиналысты да әлеуметтік желіге жүктеді. Қоғам мен жауапты тұлға арасындағы ашық саясаттың үлгісін көрсетті. Сондықтан құзырындағы қызметкерлерінен ашықтықты талап етуі заңды.
Карантин кезіндегі жағдай білім жүйесіне оң әсер етті. Еліміздің түкпір-түкпірінде ашық есік күндері, бейнеконференция, жиналыс, қоғамдық талқылау онлайн форматта өтті. Соның ішінде Білім басқармалары да әлеуметтік желі арқылы мұғалімдермен жүздесіп, сұрақтарына жауап берді. Ұстаздар да мұның тиімді тұсын жоққа шығармайды.
«Басқарма басшысы міндетін атқарушы «Тараз 24» ақпараттық агенттігі арқылы онлайн жиын өткізді. «Жамбыл адалдық алаңы» жобасы аясында тікелей эфирге шықты. Сонда сауалымызды қойдық. Тікелей эфирді күллі Қазақстан тамашалап отырған соң, сұраққа жөнді жауап берді», – дейді ұстаз Айнұр Жамалбекқызы.
Мұғалім айтқандай онлайн форматтың артықшылығы көп. Журналистер қауымы да министрлікке қояр сауалын тікелей эфирде айтып, қажетті жауабын алды. Білім басқармалары да Facebook пен Instagram арқылы вебинар, сұхбат өткізіп, пайдалы кеңес берер тұлғалармен онлайн кездесу өткізді. Сөзімізге дәлел ретінде Алматы облысы Білім басқармасы мәліметін ұсынамыз.
«Алматы облысы Білім басқармасы басшысы осы аралықта мұғалімдермен 3 рет онлайн кездесу өткізді. Оған 800-ге жуық ұстаз қатысып, бірқатар мәселені талқылады. Мектеп директорларымен, аудандағы білім басшыларымен де онлайн кездесу өткізді. Сондай-ақ 8-10-сынып оқушыларымен «Білімге ұмтыл, жас дос» онлайн конференциясын ұйымдастырды. Жақында ғана басқарма басшысы ата-аналармен онлайн кездесу өткізіп, оларға алғысын айтты. Қашықтан оқу кезеңінде табанды болып, баласының білім алуына барынша жағдай жасаған ата-аналарға онлайн алғысхат табыстады», – дейді Алматы облысы Білім басқармасының баспасөз хатшысы Інжу Заманбекқызы.
Оффлайнда ашықтық саясатынан қашық жүретін Білім басқармалары онлайнда барынша оң жауап берді. Әрине, көпке топырақ шашпаймыз. Бұрыннан білім саласында ашық жауап беретін қызметкерлер бар. Бірақ жоғарыдағы пікірлерге мән берсеңіз, ашық қоғам қалыптастыру үшін әлі де өзгеріс қажет екенін түсінесіз.
Айзат АЙДАРҚЫЗЫ 
