Биыл Алматы облысында жалпы көлемі 491,6 шақырым жолға жөндеу жұмыстары жүргізіледі. Бұл бағыттағы жұмыс наурыз айының соңында басталып кетті. Негізінен отандық шикізат пен материалдар қолданылуда. Жыл қорытындысында жалпы ұзындығы 2,6 мың шақырымдық автожол учаскелерінде қозғалыс ашу жоспарланған. Жалпы, 2020 жылдың қорытындысында «Нұрлы жол» бағдарламасы аясында республикалық автожолдардың 89 пайызы, облыстық, аудандық жолдардың 71 пайызы жақсы және қанағаттанарлық жағдайға жеткізілуі керек.
Бүгінгі таңда облыста бес жерде жұмыс қызу жүргізілуде. Жазда облыс тұрғындары Балқаш көлінің жағалауындағы демалыс орындарына заманауи жаңа жолмен желдей есіп жететін болады. Келер жылы Талдықорған – Өскемен, Талдықорған – Лепсі – Ақтоғай трассалары пайдалануға беріледі. Сонымен қатар Сарыөзек – Қорғас, Қоғалы – Көксу – Қарабұлақ жолдарын жөндеу жұмыстары жыл соңына дейін аяқталады. Қазіргі кезде Жамбыл ауданындағы Қарақастек – Сұраншы батыр жолы реттелуде. Алакөл, Ескелді, Жамбыл, Қаратал және Райымбек аудандарында күрделі жөндеуге жататын 11 көпірдің де жұмысы ретімен қолға алынды. Жалпы, облыста 300 шақырымды құрайтын 28 учаскеде орташа жөндеу жұмыстары жүргізілуде.
Жол құрылысымен қатар «Жол активтерінің ұлттық сапа орталығы» да талапты барынша қатайта түскен. Орталық үстіміздегі жылдың үш айында ел өңірлеріндегі жолдарға 1 398 рет рейд жүргізіп, 1 522-ден астам түрлі олқылықтарды анықтаған. Оның ішінде Алматы облыстық филиалының мамандары жыл басынан бері, яғни, қаңтар мен мамыр аралығында аймақтағы күре жолдың 4 171 шақырымына тексеру, бақылау жұмыстарын атқарыпты.
– Біз тексеру жүргізген жолдардың 3 551 шақырымы республикалық болса, 620 шақырымы облыстық маңызға ие. Диагностика және сараптама барысында анықталған кемшіліктерді жою және қалпына келтіру мақсатында мердігер компанияларға және «ҚазАвтоЖол» кәсіпорнына тиісінше хаттар жолданды. Филиал мамандары жалпыға ортақ пайдаланылатын автомобиль жолдары мен елді мекендер, қала көшелеріндегі жұмыстар мен материалдар сапасына сараптама жасайды. Халықаралық және республикалық маңызы бар автомобиль жолдарының талапқа сай болуын бақылап қана қоймай, жол-көлік инфрақұрылымының қауіпсіздігін де қадағалаймыз, – дейді «Жол активтерінің ұлттық сапа орталығы» РМК Алматы облыстық филиалы директорының міндетін атқарушы Ғалия Асанова.
Болат АБАҒАН,
Алматы облысы
