Nur Otan партиясының #BizBirgemiz республикалық акциясы Ақмола облысында да жалғасын табуда. Аталған науқан аясында 8 075 ақмолалық тұрғынға азық түрінде, 8 005 азаматқа 50 мың теңге көлемінде бір реттік қаржылай көмек көрсетілді. – Төтенше жағдай кезінде облысымыздағы жалғызбасты қарттарға, тұрмысы төмен көпбалалы отбасыларға, ерекше қажеттіліктері бар азаматтар мен басқа да мұқтаж жандарға әлеуметтік пакеттер үлестірілді. Сонымен қатар акция шеңберінде 8 005 адамға 7 санат бойынша 50 мың теңгеден бір реттік материалдық көмек берілді. Тағы да мобильді топ халықтың әлеуметтік осал топтарына азық-түлік тауарлары мен гигиеналық заттарды таратты, – деп жазды Ақмола облыстық филиалының баспасөз қызметі.
Көмекке қол жеткізген көкшетаулық тұрғын Екатерина Анищенко аймақтық Birgemiz Aqmola қорына алғысын жеткізді.
– Мен мектеп жасындағы 4 баланың анасымын. Қоғамдық қор маған бір реттік көмек ақша мен азық-түлік салынған корзина берді. Бұл бастаманы бастап, қол ұшын созған партиялықтардың жұмысына алғысым шексіз, – деді Екатерина Анищенко.
Қазіргі кезде де штаб жұмысы жалғасуда. Күн сайын волонтерлер «Есіктен есікке дейін» қағидасы бойынша азық-түлік салынған пакетті мұқтаж жандардың үйлеріне дейін жеткізіп беріп жатыр.
