Алматы облысының орталығында көпбалалы отбасыларды баспанамен қамтамасыз етуге қатысты қолға алынып жатқан шаралар қарқын алып тұр. Былтырғы күзден бері осындай біраз отбасының мәселесі оң шешімін тапты.
Әкімдікпен бірге қалталы қайырымды жандар да көпбалалы аналардың баспаға қатысты проблемасын шешуге атсалысуда. Дегенмен бұл бағыттағы негізгі күш мемлекетке түсері анық. Осыған орай, Талдықорған қаласында облыс орталығының әкімі Ғалымжан Әбдірайымовтың және қала тұрғындарының қатысуымен көпбалалы аналарға арналған екі көпқабатты үйдің қазығы қағылды.
Жалпы саны 125 пәтер болатын екі көпқабатты үй қаланың жаңа тұрғын үй алабында, нақтырақ айтқанда, 8 ықшамаудан аумағында орналасады. Мұнда көпбалалы отбасыларға қажетті жағдайдың барлығы ойластырылған. Қосымша қажеттіліктер туындап жатса, оларды да шешу қарастырылған. Ықшамауданда мектеп, балабақша, «Жастар» саябағы, драматеатр, Оқушылар сарайы, жастарға қызмет көрсету орталығы сынды көптеген ғимарат орналасқан. Болашақта тағы да басқа тұрмыстық, әлеуметтік нысандар салынады.
– Бүгін біз тұрғын үйлер салынатын жерді нақтылап, қазығын қақтық. Алматы облысы орталығында 3 037 көпбалалы отбасы бар. Олардың 1 146-сы пәтер алу кезегінде тұр. Біз осы көпбалалы аналарды таяу болашақта баспанамен қамтамасыз етуді жоспарлап отырмыз. Өздеріңіз білетіндей, мәселені шешуге кәсіпкерлер де көмектесуде. Алайда негізгі салмақ атқарушы билікке артылатыны айтпаса да түсінікті. Осыған байланысты жылдың соңына дейін осындай отбасыларға арналған екі бірдей көпқабатты үйді пайдалануға бермекпіз.
Келесі аптада көпбалалы аналарға арналған 100 коттедждің құрылысын бастаймыз. Жалпы, Алматыдан Талдықорғанға кіретін күре жолдың сол жағында 600 коттедждің орны бар. Ондағы 155 коттедждің құрылысы жақында аяқталады. Солардың жетпісін де көпбалалы отбасыларға бермекпіз. Бірінші кезекті құрылыстың сапасына назар аударамыз. Құрылысшы ретінде оны менің өзім бақылауға аламын, – деді Талдықорған қаласының басшысы.
Көпқабатты үйлердің қазығын қағуға ақсақалдар мен қаланың құрметті азаматтары, көпбалалы аналар да арнайы келді. Тұрғын үйлердің құрылысын LEPES ЖШС өз қаражатына жүргізуде. Оның 100 пәтері 3 бөлмеден, қалған 25 пәтері 4 бөлмеден тұрады. Үйлердің құрылысы біткен бойда жергілікті әкімдік оларды сатып алып, жылдар бойы кезекте тұрған көпбалалы отбасыларға бермек.
Болат АБАҒАН,
Алматы облысы