Жайдарман – қазақ елінің ғана емес, әлемнің түркітілдес мемлекеттері жастарының басын қосатын жоба. Осы мақсатты негізге алып, Нұр-Сұлтан қаласының қоғамдық даму істері басқармасы мен «Қазақстан КВН одағы» республикалық жастар қоғамдық бірлестігі фестиваль ұйымдастырды. Жылдағы дәстүрден жаңылмай, көршілес мемлекеттің жайдарманшыларын қонақ ететін бұл жобаға қатысушылар саны да артып келеді.
Үш күнге созылған халықаралық жайдарман фестивалі арнайы бағдарламалық жоспар негізінде жүзеге асты. Фестивальдің алғашқы күні шетелдің жастары мен қазақстандық топтарды табыстыру мақсатында ашылу салтанаты өтті. Жастар сарайының төрінде белгілі жайдарманшылардың жүргізуімен концерттік бағдарлама қойылды. Сондай-ақ фестивальдің екінші күні шетелдік қатысушылар үшін Нұр-Сұлтан қаласына арнайы экскурсия ұйымдастырылды. Қала ішінде орналасқан зәулім ғимараттар мен мұражайларды, «Бәйтерек», «ЭКСПО» кешендерін және театрларды аралады. Шара барысында қонақтарға қазақ елінің тарихы баяндалып, салт-дәстүрлері жайлы мәліметтер айтылды.
Фестивальдің үшінші күні қатысушы түркітілдес мемлекеттерден келген командалар мен қазақстандық топтар арасында жайдарман сайысы өтті. Бейбітшілік және келісім сарайында өткен додаға барлығы 10 команда қатысты. Оның ішінде 6 шетелдік, 4 қазақстандық топ бар. Атап айтқанда, елордалық «Қазақстан халқы ассамблеясының құрамасы», моңғолиялық «Баян өлке құрамасы», өзбекстандық «Қарақалпақстан құрамасы», Екібастұздан «Біз қазақпыз», Уфадан «Башқұртстан құрамасы», ресейлік «Ноғай құрамасы – Алтын орда», Шымкенттен «Бүгін.kz», Қазаннан «Татарстан құрамасы», Шымкенттегі «Нұр-Үміт» өнер орталығының «Миллион» құрамасы, Қырғызстаннан «Позитифф» командалары бақ сынасты.
Өнер көрсеткен командаларға қазылар тиісті ұпай сандарын үлестіріп, жеңімпаздарды анықтады. Нәтижесінде, «Баян өлке құрамасы», «Қарақалпақстан құрамасы», «Башқұртстан құрамасы» III орын иеленді. Оларға 150 мың теңге көлемінде қаржылай сыйлық табысталды. 300 мың теңге және II орынды «Позитифф» және «Бүгін.kz» иеленсе, I орын және 1 миллион теңге көлемінде қаржылай сыйлықты «Ноғай құрамасы – Алтын орда» командасы еншіледі. Сондай-ақ «Татарстан құрамасының» ойыншысы Наиль Салахов «Үздік ойыншы» аталымын алды.
Айша ЕРСҰЛТАН