Шегіртке шырылдап келе жатып, өзі көптен бері ғашық болып жүрген жас шегірткенің жанына ұшып келді. Қанатын қағып-қағып жіберіп, көз қиығымен ұрлана қарады. Шегірткегүл әдемі болып өсіп келеді екен. Көздері танадай, қылығы жас баладай, сирақтарын айсаңшы, ұзыын, ақ-қызыл қанатты, яғни көйлегінің өзі көз тартады.
– Қалайсың? – деп сұрады «жігіт» шегіртке.
– Шырылдап ән айтып жүрмін.
– Жарайсың!
– Өзіңіз ше? – деп сұрады «қыз» шегіртке қылымсып.
–Шырылдап ән айтып жүрмін.
–Біздің шегірткелер елі керемет қой! Ала жаздай шырылдап ән саламыз, көкорайда «гөләйттап», ән саламыз. Тек, қыста қиын болмаса...
– Ағай, естідіңіз бе?
– Нені жаным?
– Адамдардың арасында да, кейбірі біз сияқты шырылдап ән салғансиды екен.
– Ия, есіттім. Бір жігіт дұрыс айтты, оларды «шырылдаған шегіртке» деді.
– Неге бізді кемсітеді ағай? Біз не жаман әншілерміз бе?
– Бұлбұлдарға қарағанда, нашар әншіміз ғой, мойындауымыз керек.
– Мен ол кісінің әншілердің кейбірін бізге теңегендерін құптамаймын!
– Дұрыс қой, бірақ адамдар жақтан естіген жаңалығым, әншілер концертке адам жинай алмаған соң, жаппай лоторея ойынын өткізіп жатыр дейді!
–Ия, ия, естідім! Бір әнші бала ұсталып қалыпты дейді ғой?
– Қарындасым, олардың бәрінің айтатындары: «Алданып қалдым!» дейді. Алданып қалған болып, халықты алдап жүргендерін жасырып қалады.
Екеуі үнсіз қалды. Іштерінен Адамдарға, олардың ішіндегі кейбір әншілерге ызаланып тұрды.
– Неге жалған жұлдыздарды құрбақаға теңемейді? Құрбақа да түнімен құрылдап, ән салып жатады ғой? – деді «бойжеткен» шегіртке.
– Қайдан білейін? Бәрінің бұлбұл құс болғысы келеді.
– Лотореядан көөп пайда табады дейді ғой?
– Бірақ, сол лотореялары заңсыз болып, ұсталып жатыр емес пе?
– Тағы да фонограммамен ән салып, көкіректерін керетіндерін де естіп қалып жатамыз.
– Біз сияқты болмайды ма, ия? Қай шегірткенің фонограммамен ән салғанын көрдің?
– Біздің шегірткелер халқының бәрі әнші ғой! Мөңірейтін, немесе үретін шегіртке көрдің бе?
– Біз көңілді халықпыз, бірақ өзге шегірткелерді алдап, лоторея ойнатқан емеспіз ғой? – деді шегірткенің «айғыры» ұзын сирақтарын бір-біріне үйкелеп тұрып.
– Ағай?
– Әу?
– Біз де шегірткелер арасында лоторея ойнатсақ қайтеді?
– Ойбай, керегі жоқ, адамдар естісе, улы химикат сеуіп, бәрімізді қырады! Бізден көшірді деп... Одан да, екеуміз үйленейік.
– Қойыңызшы ағай...
– Сіздің даусыңыз ұнайды...
– Туу, бір түрлі болып кеттім ғой... – деген «ару» шегіртке жігіт шегірткенің тұмсығынан бір сүйді де, пырылдап ұша жөнелді. Мәз болған анау да соңынан ілесе ұшып келеді. Қатарласа беріп, қанатымен қағып-қағып, шырылдай түскен. Төмен қараса, жер бетінде қаптаған шегірткелер. «Әншілер халықты алдамасын!», «Лоторея өткізіп, бізді жарылқамай-ақ қойсын!», «Бұдан былай, шегірткелер де жалқау болмай, еңбек етсін!» деген лозунгілерді, плакаттарға жазылған ұрандарды екеулеп тістеп алғандардың қарасы көп. Қайдан естіп қойған а? Ойебай, дүние жүзінің шегірткелері, бірігіңдер!
Шегіртке демекші, кәсіпкер Нұрсила Ахметбек біраз жұлдыздарымызды шегірткелерге теңеді. Бұл – өзінің пікірі. Ал, белгілі айтыскер ақын Балғынбек Имашев оны құптады. Бұл да өзінің пікірі. Ал менің пікірім: соңғы кезде әншілердің жаппай лотерея ойнатып, немесе акция өткізгіш, конкурс жариялағыш болып кеткені жасырын емес қой? Күні кеше карантин кезінде ұсталып қалған жас әнші Ернар Айдар да «алданып қалыпты.» Тіпті, лотореяға тіккен автокөліктері жалға алынған болып шықты. Сонда, кім кімді алдап жүр? Неге бәрі «алданып» қала береді де, лотерея ойынының аяғы сұйылып кете береді? Бір тиын пайдасы жоқ болса, неге араласады мұндай тірлікке? Жоқ әлде, өмірдің өзі лотерея ма?
