Қарағанды облысы полиция департаментінің автопаркі жаңа қызметтік автокөліктермен толықты. Тәртіп сақшыларында заманауи құрылғылармен жабдықталған 86 арнайы көлік табысталды.
Қарағанды облысының полиция департаментінің бастығы, полиция полковнигі Ерлан Файзуллинге Қарағанды облысының әкімі Ерлан Қошанов жаңа арнайы машиналардың кілттерін табыс етті.
Салтанатты шара 23 маусымда еліміз бойынша атап өтілетін Қазақстан полициясы күніне орайластырылды.
– Еліміздің әр азаматының тұрақтылығы мен тыныштығы – сіздердің ерен еңбектеріңіздің нәтижесі. Тұрғындар әртүрлі өмірлік жағдайларда бірінші кезекте сіздерге жүгінеді. Күндіз де, түнде де сіздер алдыңғы қатардасыздар, – деп атап өтті облыс әкімі Ерлан Қошанов сөзінде.
Өңір басшысы құқық қорғау органдарына нәтижелі және жемісті еңбек тіледі.
Облыс әкімі егеменді Қазақстанның барлық жетістіктері тәртіп сақшыларымен тығыз байланысты екенін атап өтті. Президенттің тапсырмасы бойынша өңірде полиция департаменті бөлімшелерінің материалдық-техникалық базасын нығайту бойынша тиімді шаралар қабылдануда. Бірінші кезекте ол планшеттер, бейнетіркеуіштер, процессорлар мен арнайы көліктер.
– Бүгінгі күні қылмыс деңгейінің төмендеуі 25 пайызды құрайды. Жергілікті биліктің қолдауы жұмысымызды жақсартуға көмектеседі. Біз бұған өте ризамыз, – деді Қарағанды облысы полиция департаментінің басшысы Ерлан Файзуллин.
Жаңа автокөліктерде жол полицейлері мен жергілікті полиция бөлімшелерінің қызметкерлері жүретін болады.
Kia Cerato және Lada-URBAN машиналарын тәртіп сақшылары қылмыстың алдын алу және ашу үшін пайдаланатын болады. Әрқайсысы дабыл құрылғылармен, радиостанциялармен және бейнетіркеуіштермен жабдықталған. «ГАЗ-2705» автокөліктері қамауға алынған адамдарды тасымалдауға арналған.
Салтанатты рәсімнен кейін көліктер қызмет атқару орындарына шықты.
Ләззат ҚОЖАХМЕТОВА,
Қарағанды облысы