Бас прокуратураның арнайы прокурорлар қызметінің басшысы Ризабек Ожаров Жамбыл облысы Қордай ауданында болған тәртіпсіздікті тергеу барысы туралы айтты.
«2020 жылдың 8 ақпанында Қордай ауданының үш ауылында екі мыңнан астам адам қатысқан жаппай тәртіпсіздік болды. Нәтижесінде 11 адам қаза тауып, оның 10-ы адам қолынан, бір адам жанып жатқан сауда орталығының қирауы салдарынан қайтыс болды. 140 азамат пен 20 полиция қызметкері түрлі жарақат алды. 164 тұрғын үй және сауда объектісі, 100-ден астам автокөлік зақымданды. Жәбірленуші – 342 адам, іс бойынша 400-ден астам түрлі сот сараптамасы жүргізілді, 1,5 мыңнан астам адамнан жауап алынды. Атап өту керек, тәртіпсіздікке қатысушылар мен белсенділер екі жақтан да болды», – деді арнайы прокурорлар қызметінің басшысы ОКҚ-да өткен брифингте.
Оның айтуынша, қылмыстық жауапқа түрлі ұлт өкілінен 59 адам, оның ішінде қазақтар мен дүнгендер тартылды. Кісі өлтіру, жаппай тәртіпсіздікке қатысу, құқық қорғау органдары қызметкерлерінің өміріне қол сұғу, ұрлық, тонау, қарақшылық, қару ұрлау және мүлікті жою дерегі бойынша 29 қылмыстық іс тергеліп жатыр.
«Масанчи, Бұлар батыр және Ауқатты тұрғындарының мүлкін қиратуға, өртеуге қатысқан тәртіпсіздіктерге қатысушылардың негізгі бөлігі – жастар, жұмыссыз тұлғалар, олардың ішінде бұрын кісі өлтірген, қарақшылық, бұзақылық, тонау және зорлау үшін соттылығы болған адамдар да бар», – деп қосты Ризабек Ожаров.
Ол тәртіпсіздіктің түрлі сипатта болғанын айтты.
«Күдіктілердің қатыстылығы куәлардың айғақтарымен, елді мекендерде орналасқан бейнекамера жазбаларымен, сондай-ақ куәгерлердің ұялы телефонға түсірген видеоларымен расталады. Әрбір анықталған қатысушының іс-әрекетіне баға жиналған барлық дәлелдемеге мұқият талдау жүргізілгеннен кейін ғана анық-қанығы айтылады», – деді ол.
