Ерлік үнсіз жасалады
Ерлік үнсіз жасалады

Өмір болған соң төтенше жағдайлар болады. Сондай кезде азаматтардың өзін батыл ұстауы, жағдайға қарай әрекет жасауы, тіпті ерлік қадамдарға баруы жиі кездеседі. Кейде бір адам жүздеген кісінің өмірін құтқарып жатады. Бір адамның өмірі – құндылық! Осы ретте арамызда ерлік іс-әрекетке барса да, мұны өзінің азаматтық парызы деп білетін жандар да жеткілікті.

Ұлттық академиялық кітапха­на­ның директоры Үмітхан Мұңал­баева Арыстағы бір кітап­ха­нада күзетші болып істейтін аза­маттың әрекетіне сүйсініс біл­дірді. «Жұрт жан-жаққа бас сау­ға­лап жатқанда, әлгі азамат кітап­ха­на терезелерін ашып, ғимаратты қираудан сақтап қалыпты», – дейді ол.

Сол сияқты Арыстағы банкте күзетші болып жұмыс істейтін Пернехан Бекмырзаев жан-жақта жарылыс болып жатқанда, жұмыс орнын тастап кетпепті. «Біз тәртіп бойынша басшылықтың рұқса­тынсыз ешқайда кетпеуіміз керек. Банктің жұмысы – өте жауапты. Сондықтан да жарылыс болып жатқан кезде, қауіпті білсем де, өз жұмыс орнымда болып, басшы­лық­тан нұсқаулық күттім. Өйткені менің орнымда болған әрбір адам осылай істейді, жалпы кәсіпке деген адалдық болуы қажет», – деген сөзіне талайлар риза болып жатыр.

Президент сайлауы кезінде республикалық қоғамдық штаб құрамында Түркістан қаласында болдық. Облыс орталығында жаңа құрылыс алаңдары көбейген. Құрылысшылармен кездесу ке­зінде күннің ыстықтығы әсер етті ме, жоқ, өзінің денсаулығы сыр берді ме, бір жас жігіт көз алды­мызда құлап кетті. Сол кезде три­бунада тұрған Халық Қаһарманы Бақытжан Ертаев дереу жүгіріп барып, жалма-жан қиналып жатқан жігітке көмек көрсетті. Құрылысшы жігіттің жағын ашып, ары қарай кетіп бара жатқан тілін суырып, бетіне су сеуіп есін жиғызды. Артынан естідік: әлгі жігіттің келіншегі Бақытжан ағамыздың телефонын тауып алып, ризашылығын білдіріп, алғыс айтыпты.

Азаматтар мұндай ерлікті мақтан үшін жасамайды. Жағ­дайға қарай әрекет етеді. Кейде біз ерлік тек майдан даласында жасалатындай көреміз. Күнделікті өмірде қанша адам өзінің азаматтық парызын өтеп жатады. Бұл – шын мәнінде, сүйсінерлік әрекет.

Айтайын дегеніміз: бұрын кеңестік кезеңде азаматтық қор­ғаныс деген сабақ өтетін; сонда түрлі төтенше жағдай кезінде қалай әрекет жасау амалдары үйретілетін; тәуелсіздік тұсында сол азаматтық қорғаныс мәселесі қағыс қалып қойды. Қазіргі таңда бір керек нәрсе болса, осы азаматтық қорғаныс сабақтары шығар деген ойдамын.

Алғашқы медициналық жәр­дем жасау, тосын жағдайда ұйым­шылдықпен әрекет ету, адам өмі­ріне жауапкершілікпен қарау де­ген мәселелерді ешкім күн тәр­тібінен алып тастаған жоқ. Сон­дықтан Қазақстан мектепте­рінде жаппай азаматтық қорғаныс са­бақтары өткізілсе, ұлт ұтылмайды. Жамандыққа жұтылмайды.