"Самұрық-Қазына" ұлттық әл-ауқат қорын басқару жөніндегі кеңес отырысында Қазақстанның Тұңғыш Президенті Нұрсұлтан Назарбаев елорданы газдандыру шаралары жайында сөз қозғады.
Бейнебайланыс арқылы шыққан Үкімет басшысы Асқар Мамин биылғы жылыту маусымында елордада газ жағылатынын айтты.
"Алдағы жылу беру маусымында Нұр-Сұлтан қаласы газды қабылдайды. Бүгінде "Сарыарқа" газ құбыры пайдалануға берілді. Құбырдың ішінде қысым бар. Қазіргі кезде ЖЭС-2-ні газға ауыстыру жұмыстары жүргізіліп жатыр", – деді Мамин.
Премьер-Министрдің айтуынша, елордада газ тарату жүйелері іске асырылуда. Биыл нысандардың біраз бөлігі газға қосылады.
"Бұдан бөлек, Теміртауды газға көшіру шаралары жүргізілуде. Қарағанды мен Жезқазғанда біраз жұмыс жасалды. Жалпы, қазір құбыр желісінің бойында жатқан барлық ірі елді мекендерді алдағы жылыту маусымында газбен қамтуға тырысамыз", – деді Мамин.
Елбасы өз кезегінде ірі газ құбырының алғаш рет салынғанына, соның арқасында экологияның жақсаратынын да ерекше атап өтті.
"Біз алғаш рет оңтүстіктен солтүстікке үлкен газ құбырын тарттық. Ондайды ешқашан жасаған емеспіз. Енді, осыны халықтың игілігіне жарату қажет, халық сезінуі керек. Соның арқасында Нұр-Сұлтанның экологиясы жақсарады, қалалар газбен қамтамасыз етіледі. Халық мүлдем басқаша өмір сүретін болады", – деді Назарбаев.
Нұр-Сұлтанды газдандыру қалай жүріп жатыр?
Әкімдік мәліметі бойынша өнеркәсіп кешендері мен тұрғын үй секторларын газдандыру үш кезеңнен тұрады.
Алдағы жылу беру маусымында Көктал-1, Көктал-2, Агроқалашық, Промышленный, Железнодорожный тұрғын үй алаптарына газ жеткізіледі деген жоспар бар.
Екінші кезеңде Мичурино, Интернациональный, Күйгенжар (1-2-ші іске қосу кешені), Тельман (3-ші іске қосу кешені), Пригородный, Garden Village және Family Village (4-ші іске қосу кешені) тұрғын үй алаптары көгілдір отынмен қамтамасыз етіледі.
