Елордада карантин талаптарын бұзғандар көше видеокамераларымен анықталуда
Елордада карантин талаптарын бұзғандар көше видеокамераларымен анықталуда
Сенбі, жексенбі күндері Нұр-Сұлтан қаласында күшейтілген карантин талаптарын бұзған тұрғындар көше видеокамералары арқылы анықталып отырады. Қазақстанның бірқатар өңірінде эпидемиологиялық ахуалдың күрделенуіне және коронавирус инфекциясына шалдыққандар санының артуына байланысты Үкімет жанындағы ведомствоаралық комиссия 20-21 маусым күндері қосымша шектеу шараларын енгізген болатын. Осылайша, Нұр-Сұлтан қаласында демалыс күндері барлық сауда, ойын-сауық-орталықтарының, сауда үйлерінің, желілік дүкендердің, жабық азық-түлік және азық-түлік емес базарларының, дүкендердің жұмысы тоқтатылды. Жақын маңдағы азық-түлік дүкеніне, медициналық қызмет алуға баруды қоспағанда, азаматтардың үйден шығуына шектеу қойылған. Қала тұрғындары қызметіне рұқсат етілген нысандарға жұмысқа барып-келуіне болады.   [caption id="attachment_52323" align="alignnone" width="1024"]Нұр-Сұлтан фото: ашық дереккөз[/caption] Полиция департаментінен мәлім еткендей, сенбі-жексенбі күндері полицейлердің қызметі күшейтілген режимге көшірілді. Нұр-Сұлтан қаласы бойынша Бас санитарлық дәрігер талаптарының сақталуына мониторинг үздіксіз жасалуда. Сонымен қатар бұл жұмыстарға iKOMEK мониторинг және жедел әрекет ету орталығы жұмылдырылған.