Еселі еңбегімен еленетін бұл мерекені 1998 жылы Қазақстан Республикасының Президенті Нұрсұлтан Назарбаев бекіткен еді. Бұл күн – еліміздің барлық дәрігерлердің белсенді әрекеті мен тілектестік күні. Сол үшін де еліміздегі дәрігерлердің ерен еңбегін ескеріп, ризашылығымызды көрсеткіміз келді.
Қай ұлттың дәрігері болмасын, оның басты мақсаты – адам өмірін сақтап қалу. Біреудің жанына араша түсіп, өлім мен өмір арасындағы жанталасты жүргізетін – ақ халатты жандар. Олар бізге қолынан келмейтіні жоқ сиқыршы сияқты. Үзілген үмітті қайта жалғап, дер кезінде көңілді орнына түсіруді де біледі.
Бүгінде елімізде 70 мың дәрігер мен 140 мың кіші медицина қызметкері бар. Ал оның ішінде медицина саласы қызметкерлерінің ерен еңбегі бағаланып жүр ме? Тиісінше, бағаланбауы да мүмкін…
Бүгінде сіз бен біз үйде отырып, әліптің артын баққанда олар індет-майданында жүр. Елімізде 1 904 медицина қызметкері вирус жұқтырған. Соның ішінде 30%-ы жұмыс барысында індетке іліккен.
Бірақ олардың қай-қайсынан болсын ісіне деген адалдықты, талпынысты, қажымас қайраттылықты көрсетуде. Пандемия кезінде олар «Біз сіз үшін жұмыста жүрміз. Сіз біз үшін үйде қалыңыз» деген ұранмен елді бұл індетпен бірігіп куресуге шақырды. Олар күресіп те жатыр. Айығып шыққандары қаншама!
Мәселен, елорданың тұрғыны, қарттар үйінде тұратын 93 жастағы апамыз коронавирустан айығып шыққанның бірі. Қария №3 қалалық көпбейімді балалар ауруханасына түскен болатын.
«Барлық жағдай жасалды, өте ыңғайлы болды. Дәрігерлер жағдайымды күніге тексеріп, менің температурам мен дене қысымымды өлшеп тұрды. Елімізде осындай дәрігерлер мен медбикелер бар екеніне өте қуанамын» деген апамыз медицина қызметкерлеріне алғыс білдірді.
Осындай азаматтар еліміздің түкпір-түкпірінен табылады. Ал ол жақта қызмет етіп жүрген дәрігерлер қаншама?! Қарағанды облысы бойынша 18 мыңнан астам дәрігер бар. Оның 3 жарым мыңнан астам ақ халатты жандар эпидемиологиялық шараларға белсене қатысып, кәсіби шеберліктерін көрсетуде. Облыстық клиникалық емханасы жылына шамамен он сегіз мың адамға көмек көрсетеді.
Емханаға ем іздеп келген Виталий Галодезныйдың қан тамыры бітеліп қалған. Қатты қиналған ол, білікті мамандардың нұсқауымен Франс Галитскиге келіп, ота жасатқан. «Менің аяғымдағы тамыр жолдары бітеліп қалды. Тіпті жүруден қалдым. Сосын дәрігерге бардым. Олар ауруымды анықтап, сол тамырыма ота жасады. Бәрі сәтті болды. Өте білікті маман. Қазір өзімді жақсы сезініп тұрмын» дейді пациент Виталий Галодезный.
Осыдан екі жыл бұрын 15 жастағы ақтаулық жасөспірім Екатерина Исмагиловаға Маңғыстауда ота жасалған. «Сол кезде отаны аурухананың білікті дәрігерлері, оториноларингология бөлімінің меңгерушісі Қазбек Шүкуров, анестезиология мен жансақтау бөлімінің меңгерушісі Қазбек Келеманов, медбике Әсел Килдалиева жасаған еді. Солардың арқасында қызым өмірге қайта келді. Сіздерге мың алғыс!» дейді Екатеринаның анасы.
Қазіргі таңда Маңғыстау өңірінде медициналық ұйымдарда барлығы 8600 ақ халаттылар жұмыс істейді.
Дәрігерлер саны 1900 болса, оның 400-ге жуығы жекеменшік мекемелерде қызмет етеді. Ал медбикелер саны 5700, кіші медицина персоналдың саны – 1342. Сол секілді Атырау облысында бүгінде он мыңға жуық медицина қызметкері жұмыс істейді. Оның 2 мыңы дәрігер болса, орта деңгейдегі қызметкерлер. Былтырдың өзінде дәрігерлер 130 мыңға жауық адамның өмірін сақтап қалған.
Жанымыз көзімізге көрінгенде ғана денсаулық пен дәрігердің қадіріне жететін жаман әдетіміз бар. Десе де, қоғамда болып жатқан жағдай олар-дың қызметіне күмәнсіз адал екенін көрсетті. Күнде сан түрлі қиындықпен бетпе-бет келе ақ халатты жандарды күн сайын мадақтаудан шаршамауымыз керек. Сондықтан төл мерекеңіз құтты болсын, құрметті дәрігер!
