Дертке шалдыққандар сапалы ем алды
Мемлекет басшысы Қазақстанның коронавируспен күресте табандылық танытып, азаматтардың тез сауығуына барын салып жатқанын меңзеді. Яғни, біздің елде коронавирусқа шалдыққандар сапалы әрі тиімді тәсілдер арқылы емделген. Бәлкім, содан да шығар, Қазақстанда індеттен құлантаза жазылғандар көрсеткіші жоғары. Бұл істе індетпен күрестің алғы шебінде жүрген медицина қызметкерлерінің еңбегі ерен. Бірақ бұлай болды екен деп арқаны кеңге салуға да болмайды. Мемлекет пандемия өршіген жағдайда туындауы мүмкін мәселелерді толық шешуге қауқарлы. Үкіметке тиісті тапсырмалар да берілген. Президент «Індет қайта өршіген жағдайда оның ауқымы кеңейген кезде сіздерге қорғаныс костюмдері, қажетті препараттар, төсек-орын жетіспейді, өзге де қиындықтармен бетпе-бет келесіздер. Бұл проблемаларды таяу уақыттың ішінде шешеміз. Үкіметке шұғыл түрде бұл жағдайды дұрыстау туралы нақты тапсырма берілген. Қазір барлықтарыңызға парыз бен медициналық антқа адалдықтарыңыз үшін үлкен алғысымды білдіргім келеді. Қазақстанда 100 мың азаматқа шаққанда ауырғандардың саны 80-нен сәл ғана асады. Бұл әлемдік статистикаға сәйкес, орташа көрсеткіш саналады. Тым жаман болмаса да, өте жақсы емес. Біз ауруға шалдыққандардың статистикасын мұқият қадалағап отырмыз. Бірақ сауығып шыққандардың статистикасын жиі естен шығарып аламыз», – деді. Сонымен қатар жанқиярлық еңбектері үшін медицина қызметкерлерін мемлекеттік ордендермен және медальдармен марапаттағанын айтты. Әрі барлық медицина қызметкерлеріне алғыс білдірді.Қатер сейілген жоқ
Дегенмен Президент қатердің әлі сейілмегенін де атады. Сондықтан мұқият болмақ керек. Оның үстіне, төтенше жағдай режимі алынып тасталған соң отандастарымыздың еркінсіп кеткен жайы бар. Қазір сол салғырттықтың зардабы тиіп жатыр. «Бүгінде бүкіл әлемде коронавирустың таралуы қорқынышты ауқымға ие болып келеді. Коронавирус шабуылына ұшыраған жалғыз ел біз емеспіз. Төтенше жағдай режимі алынып тасталғаннан кейін біз еркінсіп кеттік, оны мойындау қажет. Кейбір азаматтар мен мемлекеттік қызметшілер «қауіпті кезең артта қалды, өтіп кетті» деп ойлады. Тәуекелді дұрыс бағаламау орын алып, медициналық ережелер мен ұйғарымдарды сақтауды қойдық. Жекелеген азаматтар мұндай ауру жоқ деген өсек-аяңға сене бастады. Бірақ COVID-19 әлі де үлкен қатер төндіріп тұр. Сондықтан Үкімет карантин шараларын қайта күшейтті», – деді Мемлекет басшысы. Алайда ол үшін көңіл күйді түсіріп, күйзеліске бой алдырудың еш қажеті жоқ екенін, толыққанды өмір сүруді жалғастыра беруіміз керегін айтты Президент. «Бүкіл әлемде адамдар карантин кезінде отбасымен жақындаса түскендері, балаларына, олардың проблемалары мен алаңдаушылықтарына көп көңіл бөле бастағаны туралы оқиғаларымен бөлісуде. Суретшілер, музыканттар, жазушылар, ақындар карантин уақытында шығармашылықпен өнімді жұмыс істегендерін айтуда» деген Қасым-Жомарт Тоқаев ең жаман жағдайдың өзінен тиімді дүние табуға болатынына тоқталды. Коронавирус пандемиясы да жаңа мүмкіндіктерге жол ашуы мүмкін екенін тұспалдады. «Әрбір дағдарыста жаңа мүмкіндіктер болады. Біз біргеміз. Біз бірге міндетті түрде бұл дағдарысты да еңсереміз. Одан күшті рухпен, дүниетаным мәселелеріне жаңакөзқараспен шығамыз. Ең бастысы, осынау күрделі сынақты еңсеретінімізге, жеңетінімізге сенім болуы керек», – деді Қасым-Жомарт Тоқаев.
Бейбіт күннің батырлары үшін ескерткіш қойылады
Мемлекет басшысы «BIZ BIRGEMIZ» онлайн-форумында атқарылған жұмыстарды атап өтумен қатар тың ой да айтты. Президент пандемиямен күрескен азаматтардың ерлігі үшін арнайы ескерткіш қою керек екенін атап өтті. «Бүгінгі форумда коронавируспен күрестің алдыңғы шебінде жүрген азаматтарға шынайы ризашылығымды білдіргім келеді. Осыған орай, мен «Халық алғысы» атты арнайы медальді тапсыруды ұйғардым. Бұл осындай қиын-қыстау уақытта аянбай еңбек еткен азаматтарға арналған. Жаңа мемлекеттік марапат осындай нағыз отаншыл азаматтарға тапсырылады деп сенемін. Бүгін «BIZ BIRGEMIZ» жалпыұлттық онлайн-форумы аясында осы медальмен бір топ азаматты марапаттаймыз», – деді Президент. Сонымен қатар ол: «Осы індеттен құтылған соң елордамызда азаматтарымыздың ерлігіне арналған ескерткіш қоюымыз керек. Барша Қазақстан азаматына амандық, игілік тілеймін. Біз міндетті түрде жеңеміз. Себебі біз біргеміз!», – деді.Полицияның да еңбегі ерен
Онлайн-форумда Мемлекет басшысы медицина қызметкерлерімен қатар полицейлерге де алғыс білдірді. Өйткені карантин кезінде қоғамдағы тұрақтылық пен тыныштықты сақтауда полицияның атқарған рөлі зор болды. «Мен құқық қорғау органдарының да еңбегін ерекше атап өткім келеді. Елдегі тәртіп сақшыларына аса маңызды міндет жүктеліп отыр. Қоғамдағы тұрақтылық пен тыныштық полицияның мінсіз қызметіне байланысты. Сіздер күрделі төтенше жағдай кезеңінен абыроймен өттіңіздер. Бүгінде карантин шараларының сақталуын қадалағап, бекеттерде қызмет етіп келесіздер. Бұл оңай жұмыс емес. Тіпті, қоғам өкілдері тарапынан сынға ұшыраған кездеріңіз де болды. Әрине, кәсіби тұрғыдан біліксіздік танытқан полиция қызметкерлері де жоқ емес. Осындай жекелеген жағдайлар бүкіл құқық қорғау органдарының беделіне зиян келтіреді. Дегенмен тәртіп сақшыларының басым бөлігі адал қызмет етіп жатқан азаматтар. Мұны ешкім жоққа шығара алмайды» деген Президент ішкі істер органдарының барлық қызметкерлерін кәсіби мерекелері – Полиция күнімен құттықтады. Сонымен қатар адал еңбек етіп жүрген барша азаматқа ризашылығын білдірді. «Отан алдындағы сертке берік болғандарыңыз үшін баршаңызға алғыс айтамын. Сондай-ақ әскери қызметкерлер, еріктілер, мемлекеттік қызметшілер, қайырымдылық ұйымдарының өкілдері, журналистер және басқа да белсенді азаматтарымыз зор құрметке лайық. Сіздердің арқаларыңызда коронавируспен күрестің күрделі кезеңдерін еңсеріп келеміз. Баршаңызды бейбіт күннің батырлары деуге болады. Біз өздеріңізді мақтан тұтамыз. Қажырлы еңбектеріңіз үшін ризашылығымды білдіремін», – деді Қасым-Жомарт Тоқаев.Олар алғысқа лайық
«BIZ BIRGEMIZ» онлайн-форумында «Халық алғысы» медалінің алғашқы легі де өз иелерін тапты. Орталық коммуникациялар қызметінде өткен форумда коронавирус пандемиясымен күресте ерекше көзге түскен азаматтарға аталған медаль тапсырылды. Жаңа медальмен республика бойынша түрлі саланың 343 маманы марапатталады. Олардың арасында 60 дәрігер, 39 полицей, 30 әскери қызметші, 41 волонтер, 34 меценат, 38 мәдениет және білім саласы мамандары, 25 БАҚ қызметкері бар. Президент Қасым-Жомарт Тоқаев және барлық өңірлердегі медаль иегерлері онлайн қатысқан марапаттау рәсімі кезінде Ұлттық ғылыми кардиохирургия орталығы бөлімшесінің басшысы Тимур Лесбеков, «Nomad ММА» республикалық федерациясының президенті Гаджи Гаджиев, Ұлттық волонтерлер желісінің төрағасы Вера Ким, Мейірімділер клубының жетекшісі Гүлмира Әбдірашева, меценат, қоғам қайраткері Оралбек Ботбай, Биологиялық қауіпсіздік мәселелері ғылыми-зерттеу институтының бас директоры Күнсұлу Закария, Бас әскери клиникалық госпитальдің нейрохирург дәрігері Ержан Рысқалиев, Нұр-Сұлтан қаласы Полиция департаментінің инспекторы Артур Ботабеков, елордалық волонтер Абзалбек Сұлтанбек, ғалым, кәсіпкер Әмір Қуат және «Jas Otan» жастар қанатының сарапшысы Аян Хафиз марапатталды. Ал арнайы марапат бұйырған өзге азаматтарға медаль жергілікті жерлерде табысталатын болады.Ардақ СҰЛТАН