«Ауыл» партиясының ұйымдастыруымен Ұлттық академиялық кітапханада «Алтын тұғыр – 2019» ІІІ томдық әдеби жинағының тұсаукесері өтті. Жинаққа «Ауылым – алтын тұғырым» әдеби онлайн конкурсына қатысқан шығармалар поэзия, проза, драма жанрлары бойынша топтастырылған. Әдеби жинақтың тұсаукесер салтанатына зиялы қауым өкілдері, ақын-жазушылар, драматургтер, конкурстың 2018 жылғы жеңімпаздары мен жүлдегерлері қатысты.
Ауыл» партиясы ауылдың дәстүрлі өмір салтын дәріптеп, ондағы әлеуметтік, рухани мәселелерді көркем шығармалар арқылы көпшілік назарына ұсыну мақсатында 2016 жылдан бері «Ауылым – алтын тұғырым» әдеби-онлайн конкурсын ұйымдастырып келеді. Конкурстың нәтижесі бойынша «Алтын тұғыр» ІІІ томдық жинағын басып шығару да игі дәстүрге айналды. Әдеби жинақ «Ауыл» партиясының аймақтардағы филиалдары арқылы еліміздің түкпір-түкпіріндегі кітапханаларға таратылады.
«Ауыл» партиясының төрағасы Али Бектаевтың айтуынша, жыл сайын «Ауылым – алтын тұғырым» конкурсының қатысушылары көбейген, әсіресе жас қаламгерлердің қызығушылығы арта түсуде.
«Біз – ауылдың суын ішіп, дәмін татып, ауасын жұтып өскен халықпыз. Уақытында тілімізді де, бүкіл салтымыз бен дәстүрімізді де, рухани байлығымызды да сақтап қалған ауыл. Міне, осы ауыл тақырыбында біздің ақындар, жазушылар өздерінің шығармаларын жазып, ауыл құндылықтарын дәріптеп келе жатыр. Біздің тағы бір мақсатымыз – жас қаламгерлерді қолдап, оларға мүмкіндік беріп, жазған дүниелерінің жарыққа шығуына ықпал ету болған. Бұл жоспарымыз орындалып келеді. Біздің үш жылдық еңбегіміз міне, биыл 9 томдық салмақты жинаққа айналды».
«Ауылым – алтын тұғырым» атты әдеби онлайн-конкурсы биыл да өз жалғасын тапты. Қаламгерлердің шығармалары auyl.kz порталында онлайн түрде қабылдануда. Дарынды қаламгерлеріміздің ауыл тақырыбындағы тың туындылары қазіргі әдебиетіміздің қорына қомақты үлес болып қосылары даусыз.
Ақбота ӘЛІМ