Құрылысы сапасыз, бағасы қымбат баспанаға кім жауапты?
Оның айтуынша, бүгінде құрылыс жұмыстарының сапасын қадағалайтын комиссия мүшелері арасында қоғамдық ұйымдар мен атқарушы билік өкілдері көп болғанымен, дәл осы саланың мамандары саусақпен санарлықтай ғана. Әлбетте, бұл көп жағдайда сапаның нашарлауына әкеліп соғатыны түсінікті. Сол себепті қазір «Адалдық алаңы» республикалық жобалық кеңсесінің мамандары құрылыстың сапасын құрылысшылар тексеруі керек деген ұтымды ұсыныс айтуда. – Бүгінде еліміздегі көпқабатты тұрғын үйлердің шамамен 60 пайызы ескі болып саналады. Осы бір түйткілді мәселені шешіп, ахуалды оңалту мақсатында 2011 жылы ауқымды республикалық бағдарлама енгізіліп, содан бері еліміздің үлкенді-кішілі елді мекендерінде бұл бағытта айтарлықтай шаруа тындырылды. Бұл бағытқа қомақты қаражат бөлінді. Дегенмен 2018 жылға дейін, яғни «Адалдық алаңы» жобасы жүзеге асырыла бастағанша құрылыс саласындағы жұмыстардың сапасын бақылауда жүйелілік болмаған. Ал енді біз әрбір құрылыс нысанының, кез келген жаңа тұрғын үйдің сапасын бақылауда ұстап, атқарылған жұмысқа қатысты сын-ескертпелерімізді айта аламыз, – деп түсіндірді Төлеген Байғұлов. Мұндай сын-ескертпені елордадан келген мәртебелі мейманмен кездесу барысында Өскемендегі Бауыржан Момышұлы көшесі, 14 мекенжайында орналасқан 162 пәтерлік тоғыз қабатты үйдің тұрғындары да айтты. Олардың айтуынша, бұл үйдің салынып біткеніне көп бола қоймаса да, қазірдің өзінде жөндеуді қажет ететін тұстары жетіп артылады екен. Таяуда ғана қоныстойын тойлағандардың бәрінің айтатыны бір, ол үйдің сапасыз салын ғаны. Қабырғаларда пайда болған жарықшақтар, есік-терезелердің дұрыс орнатылмауы, төбеден аққан су, ауладағы шашылған қоқыс сияқты олқылықтар жетіп артылады. Ал құрылыс компаниясының басшылығы осының бәрін біле тұра, олқылықтардың орнын толтыруға асығар емес сияқты. – Өзімнің де мамандығым құрылысшы. Бұл үйді анама алып бергенбіз. Бірақ ол кісі бұл үйде тұрудан бас тартып отыр. Өйткені үй өте сапасыз салынған. Құрылысшылардан қайыр болмаған соң жөндеу жұмыстарын өзім жүргізуге мәжбүрмін. Қазір мені бір-ақ сұрақ мазалайды, мұндай сапасыз салынған үй үшін неге айына 130 мың теңге төлеуім керек, – деп мұңын шақты тұрғындардың бірі. Төлеген Байғұлов болса, тұрғындардың мұң-мұқтажын «Шығыс – Адалдық алаңы» жобалық кеңсесіне жеткізетінін айтып, аталған мәселені өз бақылауында да ұстайтынын мәлім етті. Сонымен қатар «Адалдық алаңы» республикалық жобалық кеңсесінің басшысы Өскемен әкімдігі жанынан ашылған фронт-кеңседе де болып қайтты. Ashyq akimdik деп аталатын бұл орталыққа сапары барысында Т.Байғұлов бастаған ресми делегация мүшелері халыққа көрсетілетін қызмет түрлерімен танысып, тұрғындарды толғандыратын негізгі мәселелерден хабардар болды. Белгілі болғандай, фронт-кеңсеге келетін халықты негізінен тұрғын үй-коммуналдық шаруашылық, жер қатынастары, жұмыспен қамту, сондай-ақ құрылыс пен сәулет мәселелері көбірек толғандырады екен. «Мұнда маман кеңесін алып қана қоймай, өтініш те беруге болады, электронды сандық қолтаңба алуға да көмектесеміз», – дейді кеңсе қызметкерлері. Дәл осы жерде қала әкімінің қабылдау бөлмесі де орналасыпты. Фронт-кеңсенің жұмысымен танысқан Төлеген Байғұлов атқарылып жатқан жұмысқа оң бағасын беріп, бір ғана сын-ескертпе айтты. Оның пікірінше, фронт-кеңсе өте тар бөлмелерде орналасқан. Бұл орталықтың қызметкерлері үшін де, көмек сұрап келген тұрғындары үшін де едәуір қолайсыздық туғызады. – Аталған мәселені шешу жолдарын қарастырудамыз. Алдағы уақытта фронт-кеңсені қалалық әкімдік ғимаратының бірінші қабатына көшіруді жоспарлап отырмыз, – деді қала әкімі аппаратының басшысы Нұрлыбек Шерубаев. Айта кетейік, күніне фронт-кеңсе мамандарының көмегіне шамамен 20 шақты адам жүгінеді екен. Сонымен қатар бұл жерде Сall-орталық пен тікелей желі қызметі де жұмыс істеп тұрғанын айтқан абзал. Өскеменге сапары барысында «Адалдық алаңы» республикалық жобалық кеңсесінің басшысы болашақ қалалық жұмыспен қамту орталығы ғимаратындағы, сондай-ақ Оралхан Бөкей атындағы кітапханадағы құрылыс жұмыстарының барысымен танысып, бірқатар көшедегі жол жөндеу жұмыстарына бағасын берді.Тұрғындар медициналық көмек бойынша жиі шағымданады
Сондай-ақ «Адалдық алаңы» республикалық жобалық кеңсесінің басшысы Төлеген Байғұлов облыс орталығында «Шығыс – Адалдық алаңы» жобалық кеңсесінің кураторы, облыс әкімінің бірінші орынбасары Алмасхан Сматлаевпен бірге аталған кеңсенің жұмысы бойынша кеңеске қатысты. Онда аймақтағы денсаулық сақтау саласының өзекті мәселелерін қамтыған тұрғындар шағымына қатысты мәселелер және тұрғын үй-коммуналдық шаруашылық саласын жаңғырту жайы қарастырылды. Күн тәртібіндегі алғашқы мәселеге орай сөз алған облыстық Денсаулық сақтау басқармасының басшысы Ілияс Мұхамеджан ағымдағы жылдың алғашқы бес айында басқармаға 369 өтініш түскенін, оның 281-і жеке, 88-і заңды тұлғалардан екенін айта келе, өткен жылдың сәйкес мерзімімен салыстырғанда көрсеткіш 22,6 пайызға төмендегенін жеткізді. Өңірдің бас дәрігерінің айтуынша, азаматтардың арыздарының негізгі сипаты медициналық көмек көрсетуді ұйымдастыруға, еңбек бойынша мәселелерге, жалақы төлеуге, дәрігерлік препараттардың жоқтығына байланысты болған. Сондай-ақ дәрігерлердің әдебі мен диентологиясының бұзылуына, жергілікті жерлерде медициналық көмек көрсетуді ұйымдастыру бойынша жеткіліксіз жұмысқа, медициналық ұйымдардағы ішкі аудит қызметінің жеткіліксіздігіне қатысты да шағымдар туындаған. – Облыстың денсаулық сақтау саласындағы жүйелі проблемаларды шешу үшін денсаулық сақтау жүйесінің тиімділігін арттырудың 2017-2019 және 2020-2024 жылдарға арналған, жергілікті бюджеттен қаржыландырылатын кешенді жоспары әзірленді. Бағдарламаның негізгі бағыттары – адам капиталын дамыту, қан айналым жүйесі аурулары, ана мен баланы қорғау, онкология бағыттары бойынша ресурстар мен технологияларды дамыту, – деген Ілияс Мұхамеджан соңғы үш жылда облыстың денсаулық сақтау саласында іске асырылған ауқымды реформаларға жеке-жеке тоқталды. Кеңесте оның айтқандарын толықтыра түскен Алмасхан Сматлаев енді өңірдің дәрігерлері әлемнің жетекші емханаларында тек үш айға ғана емес, бір жылға дейін біліктіліктерін шыңдай алатынын жеткізді. Ал өңірдің ТҮКШ саласын жаңғырту бойынша баяндаған облыстық Энергетика және коммуналдық шаруашылық басқармасының басшысы Дәулет Батырбаев Еуропалық қайта құру және даму банкі арқылы жүзеге асырылатын бірқатар ірі жобаға тоқталды. Мәселен, солардың қатарында Өскемен және Семей қалаларында тұрмыстық қатты қалдықтар полигонын салу жобалары бар. Сондай-ақ басқарма басшысы өңірдің қалалары мен аудандарындағы абаттандыру, жарықтандыру бағытында атқарылған шаруаларды да атап өтті. Жиын барысында осы екінші мәселеге қатысты сөз алған Төлеген Байғұлов шығысқа жасаған сапары аясында Семейдегі Қарағайлы тұрғын ауданында салынып жатқан құрылыстармен танысқанын, ондағы көпқабатты тұрғын үйлердің құрылысында біраз кемшілік анықталғанын, оларды түзетуді қала әкімінің орынбасары өзінің бақылауына алғанын мәлім етті. Оның айтуынша, мұндай жағдайлар Өскемендегі құрылыс нысандарын аралау барысында да кездескен. Бұл мәселе бойынша жауап берген Өскемен қаласы әкімінің орынбасары Тамара Рахымжанова айтылған сынның орынды екенін мойындап, аталған баспаналардың құрылысына жауапты мердігермен тиісті жұмыстар жүргізілетінін айтты. Төлеген Байғұлов сонымен бірге облыс орталығындағы көшелерде қоқыстардың заңсыз шашылып жатқан фактілері де кездескенін айта келе, бұл бағытта жұмысты ширата түсуді жергілікті полиция қызметіне тапсырды. «Шығыс – Адалдық алаңы» жобалық кеңсесінің жұмысын қорытындылаған Алмасхан Сматлаев кеңесте көтерілген мәселелердің барлығы да назарға алынып, нақты шешімдер қабылданатынын жеткізді.Дәурен АЛЛАБЕРГЕНҰЛЫ, Шығыс Қазақстан облысы