Қазақстан Парламенті Мәжілісінің депутаттары Қожахан Жабағиев пен Әбдіманап Бектұрғанов Жамбыл облысына іссапары барысында Президент жүктеген 10 міндетті іс жүзінде жүзеге асырып, халықтың тұрмыс сапасын жақсарту мақсатында атқарылып жатқан жұмыстарды бағамдады. Алдымен тәулігіне 80 тонна сүт өнімдерін өндіруге қауқарлы «Көкжиек» ЖШС еңбек ұжымымен кездесіп, кәсіпорын жұмысымен танысты.
Облыс орталығындағы жылына 80 тонна сүт өңдеуге қуатты «Көкжиек – 2030» ЖШС өткен жылы сүт өңдейтін және толығымен автоматтандырылған цифрлы басқару жүйесі енгізілген зауыт іске қосылған болатын. 2007 жылы құрылып, сүт өнімдерін өндірумен айналыса бастаған өндіріс орны былтыр жыл соңында қайта кеңейтіліп, модернизацияланды. Еңбек өнімділігін арттыру мақсатында Италиядан жеткізілген соңғы үлгідегі технологиялармен жарақтандырылды. Жобаға тартылған инвестиция көлемі – 1,6 миллиард теңге. Зауыттың қуаты – жылына 80 тонна сүт өнімін өндіруге жетеді. Ал қажетті шикізат Жуалы, Жамбыл, Байзақ, Т.Рысқұлов, Қордай, Мерке аудандарынан және Түркістан облысынан жеткізіліп жатыр. Кәсіпорын директоры Әбдіғали Бегімбетов бүгінгі таңда сүт бағытындағы 4 ауыл шаруашылығы кооперативімен бірлесе жұмыс жүргізіп жатқанын, алдағы уақытта кооперативтер санын 10-ға жеткізуді жоспарлап отырғанын тілге тиек етті. Аталған зауыт өндірген өнім көлемі соңғы бес жылда 186,2 миллион теңгеден 774,3 миллион теңгеге дейін өсіп, тұрақты жұмысшылар саны 32-ден 48-ге артқан. Орташа айлық жалақы 102-140 мың теңге аралығында. Өткен жылы зауыт 778 миллион теңге болатын 81 тонна өнім шығарып, жоспарды толығымен орындаса, биыл бірінші жартыжылдық қорытындысы бойынша 389 миллион теңге қаржы көлемі болатын 41 тонна өнім өндіріп отыр. Сүт және ет өнімдерін тереңдете өңдеуге және өндіріс орындарын цифрландыруға ерекше көңіл бөлінеді. Толықтай цифрландырылған «Көкжиек – 2030» жауапкершілігі шектеулі серіктестігі зауытының іске қосылуы – осының айғағы. Жалпы, облыста сүт өнімдерін өндіретін 18 кәсіпорын жұмыс істейді. Сондай-ақ серіктестік басшысы өңірдегі қожалықтар мен жеке азаматтарға 100 бас сиырға дейін сатып алып бере алатынын айтады. Қазір серіктестік аймақтағы 35 шағын қожалықтардан күнделікті сүт алып отыр. Сүт қабылдау бағасы – 95 теңге.
– Бүгінгі күні екі қолға бір жұмыс таба алмай отырған азаматтарға да жұмыс тауып бере аламын. Мысалы, 10 бас сауын сиыр алған азамат қайтарымын бес-алты айда өтей алады. Тек еңбек етсе болғаны. Қазір ішкі нарықта Ресей, Беларусь өнімдері көбейіп тұр. Алайда, ішкі өнімді толық қамтуда біздің әлеуетіміз де жетеді. Әзірге ішкі нарықтағы үлесіміз – 20 пайыз. Субсидия мәселесі де оң жамбасқа келмей тұр. Ендігі мәселе – шағын және орта бизнес нысандарын тексеру, әкімшілік кедергілер азайса екен, – дейді депутаттарға өтінішін жеткізген Әбдіғали Бегімбетов. Парламент Мәжілісінің депутаты Қожахан Жабағиев бүгінгі күні көрші Өзбекстан мемлекетінің ірі қара басына сұранысы артқанын алға тартып, жергілікті шаруаларды қолдауда тың бастамалар қолға алынып отырғанын айтты. «Бүгін Тараз қалалық жұмыспен қамту орталығында болдық. Онда облыс орталығы бойынша 7,5 мың адам жәрдемақы алуға өтініш беріпті. Егер осы азаматтардың қатарынан тірліктің көзін тауып, бала-шағасының несібесін қосымша жұмыс көзімен табамын дейтіндер болса, осы серіктестіктен несиеге он бас сиыр алып, оның өтеуін сүтпен өтей алатынын да жеткізу керек. Бұл – үлкен мүмкіндік. Ал осындай істің көзін тапқан азаматтарға әкімшілік кедергі келтірмей, қолдағанымыз дұрыс», – деді Қожахан Жабағиев. Бұдан кейін Мәжіліс депутаттары Тараз қаласындағы Жамбыл жоғары политехникалық колледжіне барды. Арнаулы орта оқу орнында атқарылып жатқан жұмыстарды колледж директоры Жанар Орынбаева айтып берді. Колледжде бүгінде 3 200 студент білім алса, оның 2 900-і бюджет есебінен оқып жатыр. Колледжде барлығы 500 адам еңбек етсе, оның 230-ы – оқытушылық құрам. 30 мамандық бойынша білім беріп жатқан колледж биылғы оқу жылының өзінде нәтижелі жұмыспен қамту бағдарламасы бойынша 170, бюджеттен 200, тегін кәсіптік білім беру бағдары бойынша 130 грант алып отыр екен. Білім мекемесі мен студенттердің қол жеткізген жетістіктерін айтып берген Жанар Рымбекқызы колледж еліміздегі үздік он колледждің қатарына еніп отырғанын да мақтанышпен жеткізді. Бұдан соң халық қалаулылары елімізде теңдесі жоқ «Тараз-Арена» спорт кешеніне келді. Депутаттармен бірге жүрген қала әкімінің орынбасары Кенжебек Олжабай қаланың қоғамдық және әлеуметтік өмірінен деректер айтып берді.
Жамбыл облысы