Алматы облысы бойынша төтенше жағдайлар жөніндегі департаментте өрт кезінде үш бірдей баланы ажал аранынан арашалап қалған Алмас Ризабеков марапатталды.
Ол Ескелді ауданының орталығы Қарабұлақ ауылындағы көшелердің бірімен өтіп бара жатқан Алмас сол маңдағы бір үйдің лаулап жанып жатқанын көре салып, бірден Алматы облыстық төтенше жағдайлар департаментінің кезекшілігіне хабарласады. Өрт сөндірушілер келгенше қарап тұрғанды жөн көрмеген және көмек сұраған балалардың шырқыраған дауысын естіген жігіт өз өміріне қауіп төнгеніне қарамастан, жалынға оранған үйдің терезесін сындырып, оттың ішіне қойып кетеді. Ересектердің қарауынсыз қалған және өрт кезінде қайда тығыларын білмей әбден қорыққан балаларды сыртқа алып шығады.
Алматы облысы бойынша төтенше жағдайлар департаменті басшысы міндетін уақытша атқарушы, полковник Серікхан Тұраров Ішкі істер министрінің 2019 жылдың 9 шілдесіндегі бұйрығына сай, балаларды өрттен құтқару кезінде көрсеткен ерлігі мен батылдығы үшін Алмас Ризабековті «Өртте көрсеткен қайсарлығы үшін» медалімен марапаттады.
«Алмас Ризабеков кез келген ересектің өзі бара бермейтін қадамды жасап, үш бірдей баланы ажал аузынан суырып алды. Облыс тұрғындарының арасында қайсарлық сыналар сәт туған кезде басын өлімге тіге отырып, адамдарға көмектесуге дайын жандардың бар екендігі қуантады. Алмасқа амандық пен бақыт тілейміз» деген полковник балаларды құтқарған батырдың анасы Әлия Кенжебаеваға Ішкі істер министрінің Алғыс хатын тапсырды.
Болат АБАҒАН
Алматы облысы