Мемлекет басшысы Қасым-Жомарт Тоқаев Twitter-дегі парақшасында біздің «Айқын» газеті жайлы жылы пікір білдірді. «Айқын» қарапайым еңбек адамдарын үнемі насихаттайды. Жақында етік тігетін жас кәсіпкер туралы жақсы сұхбат жарияланды. Отандық өнімді қолдау мақсатында мен де бір аяқкиімін сатып алдым. Адал еңбек етіп, нақты кәсіппен айналысуға деген көзқарас орнығуы тиіс», – деп жазды Қасым-Жомарт Тоқаев.
Мемлекет басшысы мысалға келтіріп отырған бұл сұхбат «Айқын» газетінің 30 шілде күнгі, №115 санында жарияланды. Етікші, Shoes Republic аяқкиім фабрикасының басшысы Дәурен Раманқұл сұхбатында елімізде етікшілердің тапшы екенін айта келе, «Фабриканы ашқандағы мақсатымыз – қарапайым елдің қаржысы жететін тиімді бағада сапалы аяқкиім ұсыну. Біздің тұтынушыларымыз қолжетімді бағаға таза теріден тігілген, сапалы аяқкиім алғанына риза. Жыл өткен сайын тұрақты тұтынушылардың қатары көбейіп келе жатқанына қуанамын» деген болатын.
Енді, міне, Дәуреннің тұтынушыларының қатарына ел Президентінің өзі қосылып отыр. Дәуреннің айтуынша, Президенттің баспасөз хатшысы Берік Уәли хабарласып, Мемлекет басшысы оның «Айқында» жарияланған сұхбатын оқып, қатты риза болғанын, жас кәсіпкердің отандық өнімін қолдау мақсатында аяқ-киімін сатып алатынын жеткізген.
«Мен Президенттің баспасөз хатшысына өнімдерімнің суретін жібердім. Мемлекет басшысы соның ішінен өз таңдауын жасады. Біз туфлиді «Қазпошта» арқылы салып жібердік. Бағасы 21 мың теңге тұратын, 43-размерлі қою қоңыр туфлиді таңдап, сатып алды», – дейді Дәурен Раманқұл.
Айта кетейік, бұдан біраз күн бұрын ғана Президенттің баспасөз хатшысы Берік Уәли Қасым-Жомарт Тоқаевтың бірнеше қазақ газетін күнделікті оқитынын айтқан болатын. Соның ішінде «Айқын» да бар.