«Симба Алматыға бүгін жеткізіледі. Одан ары зообаққа беріледі. Жыртқыш қазір арнайы жәшікте қамаулы. Оны жеткізуді «Охотзоопром» РМКК мойнына алған. Орталық мамандары жануарға осындай ыңғайлы жәшік жасады. Бұйырса, кешке дейін арыстан Алматыда болады», – деп жазды ол Facebook парақшасында.
Алматыда аң патшасын Алматы облыстық орман шаруашылығы және жануарлар әлемі инспекциясының жабайы жануарларды қоныстандыру орталығының мамандары күтіп алған.
Симбаға кеше анестезиялық екпе салынатыны хабарланды. Себебі арыстан әуе жолымен тасымалдағанда мазасы кетпес үшін арнайы дәрімен ұйықтатылуы керек екен.
Есте болса, 25 маусымда Маңғыстау облысының Ақшұқыр ауылының жергілікті тұрғындары көшеде жүрген арыстанды көріп, дабыл қаққан болатын. Жыртқыш жануарды мамандар ұстап алған. Алматы зообағы арыстан Симба үшін арнайы вольер салуға дайын екенін хабарлады. Вольер құрылысының шығынын Snow Leopard Foundation жекеменшік халықаралық қоры мойнына алды.
10 шілдеде арыстанды заңсыз бағып алған 25 жастағы Ақтау тұрғынына қатысты сот үкімі шығып, 27 мың теңге айыппұл салынды.
