Жедел жәрдем екі мәрте алып кетпеген
Түркістан облысының Қазығұрт ауданынан хабарласқан оқырманымыз «дәріханаларда қажетті дәрінің жоқтығын, жедел жәрдем көлігінің ауруханаға алып кетпегенін» айтып, реніш білдірді. Аты-жөнін көрсетпеуді өтінген Қазығұрт ауданы Қарабау ауылының тұрғыны қант диабетімен ауыратын енесінің өкпесі қабынып қатты ауырғанын, алайда келген жедел жәрдемнің науқасты тек көріп кеткенін айтады. Олар ауруханада орын жоқ деп науқасты алып кетпегені былай тұрсын, ешқандай ем-дом да жасамаған. «Жедел жәрдеммен келген медицина қызметкерлерінен пайда болмаған соң өзіміз үйде 16 күндей цефазолин, цеф-3 уколын салдырттық. Бірақ енемнің беті бері қарамай, өкпесінен демала алмай жатты. Сосын тағы да жедел жәрдемді шақырттық. Бұл жолы да әкетпеді. «Орын жоқ, тек су іше беріңіздер» деп тастап кетті. Амал жоқ, араға таныс салып, такси жалдап енемізді ауруханаға апарып жатқыздық. Өкпесін рентгенге түсіргенде пневмония деген қорытынды шығарды. Ауруханаға жатқыздық деген аты болғанымен, дәрі-дәрмегін өзіміз іздедік. Ауданнан таппай, қайын сіңлім Шымкент қаласынан тауып, жіберіп тұрды. Жалпы, аудандық ауруханада науқастарға жағдай жасалмаған», – дейді ол. 70 жасты алқымдаған қарияның 12 күн ауруханада ем қабылдап үйіне шыққанымен әлі де жөтелі бар екенін айтады. «Өзіміз апамыздың артынан ауруханаға барып жүргенде ақ матаға оралып шығып жатқан мәйіттерді кезіктірдік. Енем де қасында бірге жатқан үлкен кісілердің біразының көз жұмғанын айтып келді. Аппараттың тапшылығы, оттегінің жетіспеуі салдарынан болса керек», – дейді тағы бір қазығұрттық оқырманымыз. Сонымен бірге Қақпақ ауылында тұратын атасының қарындасы да осындай дертпен ауруханаға түсіп, о дүниелік болыпты. Келіні ауруханаға бекер апардым деп өкініп отыр екен. Жалпы, айтса айтқандай-ақ қазір ел ішінде «ауруханаға барудың керегі жоқ, барсаң өлігің шығады» деген үрей бар екені рас. Демек, дәрігерлердің көз алдында жатқанымен, жасанды жолмен ауа беру аппаратының жетіспеуі, дәрі-дәрмектің жоқтығы талай жанды титықтатып жіберсе керек. Одан қалса, айналасындағы қиналып жатқан жандарды көрген кез келген адамның бойын үрей билеп алары сөзсіз, кейін ол ойдан айығып кету де оңай емес. «Ауыл тұрғындарының ауруханаға сенімі жоғалған. Біразы жекеменшік медициналық орталықтарға барып, ем алып жүр. Жұрттар қалтаңда ақшаң, не болмаса танысың болмаса, жағдайың қиын екен дегенді айтады», – дейді ол. Иә, аты-жөні аталмаған соң сізге бұл ел ішіндегі жел сөз сияқты болып көрінер. Дегенмен дәл мұндай әңгіменің сіз бен біз талайын естігеніміз жасырын емес. Тіпті, талайымыз медицина саласындағы олқылықтардың салдарынан туысымыздан, жақынымыздан көз жазып қалдық емес пе?!.
Билігі мен тұрғыны
екі планетада өмір сүре ме?
Дегенмен ресми өкілдер ахуалдың тұрақтылығын, емделушілер үшін барлық жағдайдың жасалғанын айтудан танбай келеді. Мәселен, Қазығұрт ауданы әкімінің орынбасары Серік Тұрсынқұлов жалпы коронавирусты жұқтыру дерегімен 24 адамның тіркеліп, оның қазіргі таңда 16-ы жазылып шыққанын, қайтыс болғандардың жоқ екенін мәлімдеді. Сонымен бірге ресми дерекке сүйенсек, дәл қазіргі таңда провизорлық госпитальда пневмония диагнозымен 119 адам жатса, оның 7-еуі жансақтау бөлімінде екен. Ресми өкілдің мәлімдеуінше, пневмониядан ажал құшқандар жоқ.
Сонда дейміз-ау, әкімдіктегілер басқа планетада, тұрғындар басқа мемлекетте өмір сүре ме? Сіз Қазығұрт ауданы бойынша пандемия кезінде бірде-бір адам пневмониядан көз жұмған жоқ дегенге сенесіз бе? Ал біз шағым айтқан тұрғындарды жалған сөйледі деген күннің өзінде бұған сене алмай отырмыз. Себебі еліміздегі барлық қалада, ауданда осынау дертпен арпалысып, мәңгілік мекеніне аттанғандарды күн сайын естіп отырмыз. Мәселен, айналдырған 1 айдың көлемінде 2 көршіміз, 2 ұжымдасымыз, бірнеше әріптесіміз бен ағайынымыздан айырылдық. Демек, Қазығұрт аудандық ауруханасында атасының қарындасы қайтыс болды деп атап өткен оқырманымыздың сөзі жалған болғаны ма? Әлде, дәрігерлер оның диагнозын өзгертіп жіберді ме екен?
Аудан әкімінің орынбасары 20 күн бұрын дәрі-дәрмек тапшы болғанын растайды. Қазір барлығы да жеткілікті екенін айтады. Аудандық орталық аурухана провизиясында дәрі-дәрмектің 2 айға жететін қоры болғанымен, кейбір дәрі-дәрмектің тапшылығы бар екенін жоққа шығармайды. Олар негізінен осынау дертке ем болатын қажетті дәрі-дәрмек. Сонымен қатар арнайы құрылған мобильдік топ дәріханалардың бірінде мифепристон дәрісінің 1 таблеткасын 5 000 теңгеге және мизопростол дәрісінің 4 таблеткасын 7 000 теңгеге белгіленген шекті бағадан бірнеше есе жоғары бағаға сату дерегін анықтапты. Бұл ел ішінде бейберекетсіздік бар деген сөз.
Шымкент пен Түркістан билігі
қашан келіссөзбен жұмыс істейді?
Қазығұрттық тағы бір оқырманымыз дәрі-дәрмек тапшылығынан зардап шеккенін айтады. Тапқан дәрілерін бірнеше есе жоғары бағамен сатып алған. Ал бұрынғы облыс орталығы болған Шымкент қаласының дәріханалары дәрігердің рецептісінсіз бермей, әбден әуреге салыпты.
Дәл осындай проблема көп адамның басында кездесті. Түркістан облысына қарасты барлық ауданның тұрғындары үшінші мегаполис саналатын үлкен шаһар Шымкент қаласынан дәрі іздегені рас. Себебі облыс орталығы болып танылған Түркістан қаласы енді ғана аяқтан тұрып, кеңейіп келеді. Ал дәріханаларының саны сол баяғыша. Түркістан қаласы облысты дәрімен қамтымақ түгілі, жергілікті тұрғындарына жеткізе алмай отыр. Ендеше өңір тұрғындары үйренген Шымкент қаласына жол тартады. Ал дәл осы кезде дәрі таппай қиналған жұрт тарапынан Шымкенттегі дәріханаларға деген наразылық көптеп айтылды. Түркістан облысы мен Шымкент қаласының тіршілігі әлі де біте қайнасып жатқанын ескерсек, осынау қиын-қыстау тұста екі жақтың басшылығы қандай да бір меморандум жасап, келісімге келуге, бірігіп жұмыс істеуге не кедергі? Осындай екі өңір билігінің келіссөздер жасамауының зардабын тұрғындары тартып отыр. Мәселен, көктемде қойылған блок-бекеттің салдарынан екі жақта қатынап жұмыс істейтіндер көп қиналды. Бұл кезде ешқандай келіссөздер жасалған жоқ.
«Ауруын жасырған өледі» деген қазақтың тәмсілі өте орынды айтылған. «Бізде бәрі тамаша» деп отыра бергеннен ұтылмасақ, ұтпаймыз. Түркістан облыстық Қоғамдық денсаулық сақтау басқармасы баспасөз қызметінің мәлімдеуінше, өңірде соңғы бір тәулікте коронавирус инфекциясының өсімі төмендеп, 0,8 пайызды құрапты. Жалпы, өңірде қазіргі сәтке COVID-19 инфекциясын жұқтырған 2 497 жағдай тіркелген. Облыс бойынша 371 дәрігер қауіпті дертпен күресте аянбай еңбек етіп келеді.
Баспасөз қызметінің бәрінен бұрын жұқпалы аурулар бөлімдеріндегі 440 орынның 60 пайызға жуығы бос тұр деген мәліметі көңілге қуаныш ұялатты. Дегенмен жоғарыдағыдай Қазығұрт ауданының 13 ауыл округінде қауіпті дерттен бірде-бір адам көз жұмбады деген біртүрлі мәліметінен соң еш нәрсеге де таңғалмай отырмыз…
Назгүл НАЗАРБЕК
