Ақтау қаласында «ҚазТрансОйл» АҚ жас мамандар форумы аясында «Болашақ бүгіннен басталады» атты конференция өтті. Конференцияға «ҚазТрансОйл» АҚ бас директоры Димаш Досанов қатысты. Еліміздің түкпір-түкпірінен келген озық идея, тың жоба, соны бастамалар бастауы – терең білімді әрі білікті жүз жас маман ток-шоу форматында компания басшысына өздерінің сауалдарын қойып, компанияның дамуы, жұмыс процесіне цифрландыру мен роботтандырудың әсері туралы жан-жақты мәселелерді талқылады.
«Бүгінде ҚазТрансОйлда 32 жасқа дейінгі 1 213 жас маман жұмыс істейді. Компания жастарға үлкен үміт артады. Оларды қолдау үшін арнайы Жол картасы әзірленген. Кешенді құжатта жастардың кәсіби дамуы, инновациялар және технологиялар, қауіпсіздік мәдениеті, патриоттық тәрбие, салауатты өмір салтын насихаттау, қайырымдылық, студенттерді қолдау сияқты жастардың дамуына ықпал ететін басым бағыттар қарастырылған. Бүгінде компанияда кадрлық резерв саясатын жетілдіру жоспарланып отыр. Кадрлық резервке қабылдау бойынша жасқа шектеу қойылмайды, дегенмен таңдау кезінде болашағы зор жас мамандарға басымдық беріледі» деп атап өтті кездесуде Димаш Досанов.
Жастар жылында «ҚазТрансОйл» 5 жылға есептелген ауқымды жобаны бастап кетті. Еліміз бойынша жазда 400-ден астам колледж және жоғары оқу орындарының студенттері өндірістік тәжірибеден өтіп жатыр. Кәсіби тұрғыдан дамуға мүмкіндік алған колледж оқушыларына компания 70-80 мың, ал университет студенттеріне 100-120 мың теңге көлемінде шәкіртақы төлейді. Бұл да – жастарға үлкен демеу болар қамқорлық.
Конференция аясында «ҚазТрансОйл» АҚ бас директорының орынбасары Орал Идырысов, «Самұрық-Қазына» АҚ трансформация жобалары портфелін басқару департаментінің директоры Мадияр Сұлтанбек, «ҚазТрансОйл» АҚ пайдалану департаментінің жетекші инженері, жас мамандар кеңесінің төрағасы Данияр Смағұлов, «Самұрұқ-Қазына» АҚ Корпоративті университетінің атқарушы директоры Дәурен Беспалинов, «Жас Өркен» бағдарламасының түлегі, «Самұрық-Қазына» Корпоративті университетінің сараптама және роботизация орталығының сарапшы-менеджері Әділ Әбдіханов жас мамандармен сарапшы ретінде өз пікірлерімен бөлісті.
«Қанатын кеңге жайған «ҚазТрансОйл» компаниясы Қазақстанның 12 облысында қызмет етіп келеді. Бізде еңбек ететін жас толқын мақтан етуге тұрарлық. Өндірісті өркендетіп, сан алуан салаға серпін беріп жүр. Дәстүр сабақтастығын жалғап, еліміздің әр түкпірінен жастар бас қосатын форумдар өткіземіз. Биыл мұнайлы өлкеде өтіп жатқан форумның мақсаты – озық ойлы, қызу еңбек қазанында шыңдалған жас мамандар буынын қалыптастыру. Сонда ғана біздің компания алдыңғы лектен бой көрсетеді», – дейді компания бас директорының орынбасары Орал Идырысов.
Форум аясында өткен ғылыми-практикалық конференцияда жас мамандар мұнай құбырларының ішкі бетінің коррозия процестерін зерттеу, төмен температура жағдайында мұнай тасымалының тиімді тәсілдері, тағы да басқа ғылыми жобалары туралы айтып берді. Ізденіс үстіндегі компания жастары өндіріс үрдісін оңтайландыру, жеделдету әрі сапалы нәтижеге қол жеткізу, әсіресе, қауіпсіз, жоғары сапалы, жылдам мұнай тасымалын жүзеге асыру бойынша озық, тың идеяларын ұсынды.
Мәселен, Жезқазған мұнай басқармасының диагностика бойынша инженері Мейіржан Серіков мұнай-газ саласындағы роботтандырылған инспекциялық жүйе туралы баяндады. «Ұсынған жобамның негізі – мұнай тасымалын бақылау әрі диагностикалау үрдісінде роботтық технология мүмкіндіктерін ұтымды пайдалану. Бұл мұнай резервуарлары жай-күйін диагностикалау, талдау, зерттеу, еңбек және қоршаған орта қауіпсіздігін сақтау, шығынды қысқарту және өндіріс үрдісінде орын алатын істен шығу қаупін сейілтуге бағытталады. Мақсат – магистральды мұнай құбырлары және мұнай қоймалары бойындағы ақауларды дер кезінде анықтау және жоюға қамдану, қауіпсіз «қара алтын» тасымалын қамтамасыз ету» дейді ол.
Алпауыт мекеме ісін ілгері сүйреп жүрген жас буын өкілдерінің бірі – Жанәділ Мархабай. Шымкент мұнай басқармасының учаске бастығы ғылыми кеңес барысында «Өндіріс мамандарының білімі мен біліктілігін шыңдауға бағытталған «Даму» бағдарламасымен» таныстырды. «Оқыту бағдарламасы арқылы кез келген қызметкер өз біліктілігін шыңдай түсуге, өндіріс құрылғылары және т.б. қажет дүниелер жайлы фото, аудио және бейнежазабалармен қоса толық мағлұматқа қанығу мүмкіндігіне ие болады» дейді Жанәділ Мархабай.
Атыраулық Нұржан Қонарбаев мұнай құбырларын диагностикалауды компьютерлік бағдарламалау бойынша өз жобасын ұсынды. «Цифрлы технология мүмкіндігіне иек арта отырып, қысқа мерзімде өте сапалы қызмет атқара аламыз. Ең алдымен компьютерлік бағдарламаны қолданысқа енгізу қағазбастылықтан арылтады. Мәселен, құбыр диагностикасы бойынша ақпаратты қағаз бетінде қорыту, есебін беру екі не үш тәулікке созылатын еді. Ал Simplify жаңа бағдарламасы арқылы бірер секунд ішінде толық мағлұматқа қол жеткіземіз. Бұл жоба көптеген мәселелер шешіміне айналмақ. Ең бастысы, мұнай құбырларын сапалы іске қосу бойынша нақты әрі дәл мәлімет алу мүмкін болады. Егер жаңа жоба басшылық тарапынан қолдау тапса, тәжірибе жүзінде қолданысқа енеді деген сенімім мол», – дейді Атырау мұнай құбыры басқармасының диагностика бойынша инженері Н.Қонарбаев.
Маңғыстау мұнай құбыры басқармасының бақылау өлшеу аспаптары және автоматика маманы Сырым Әбдіжамал мұнай құбырларын тазарту құрылғыларына онлайн тәртібінде талшықты-оптикалық байланыс желісі арқылы мониторинг жасау жобасын басшылық назарына ұсынды.
Жалпы ғылыми конференция аясында ілкі буын өкілдерінің назарына іліккен тың жобалар, жаңа идеялар аз болған жоқ. Конференция жұмысына қатысқан «ҚазТрансОйл» АҚ бас директорының орынбасары Ален Таңатаров және техникалық саясат департаментінің басшысы Берік Саяхов жастардың тың идеяларына жоғары баға беріп, сәттілік тіледі.
Форумда жастар «Көпшілік алдында сөйлеу мәнері», Time management, «Ұқыпты өндіріс» тақырыбы бойынша тренингтерге қатысты. Бұдан өзге «Компания болашағын қалай көремін» тақырыбында эссе жазудан жарыс өтіп, жеңімпаздарға Құрмет грамоталары табысталды.
«ҚазТрансОйл» АҚ жас мамандар форумына Ақтөбе, Атырау, Қарағанды, Құлсары, Маңғыстау, Павлодар, Шымкент мұнай құбыры басқармаларынан, Шығыс және Батыс операторлық қызметтер көрсету басқармаларынан, «Ғылыми-Техникалық орталық» филиалы, «Магистралды су ағызғысы» ЖШС-дан – барлығы 100 жас маман қатысты.
Голрох ЖЕМЕНЕЙ