Ұшақ апатына қатысты өтемақы беріледі
Ұшақ апатына қатысты өтемақы беріледі
Мемлекет басшысы Үкіметтің кеңейтілген отырысында Bek Air-ге тиесілі ұшақ апатынан зардап шеккендерден хаттар түсіп жатқанын, олардың әлі ақшалай өтемақы ала алмай жүргенін айтты. «Жұмысқа жарамсыз жағдайда қалғандары, ауруханада жатқандары бар. Осыған байланысты қандай шаралар атқарылып жатыр?» деген Президент Қ.Тоқаев бұл сауалын Премьер-Министрдің орынбасары Роман Склярға қарата айтты. Роман Скляр көз жұмғандардың отбасы­ларына 4 миллион теңгеден көмек көрсетілгенін, енді ұшақта болған­дардың бәріне сақтандыру компа­ниясы арқылы тиісті көмек берілетінін жеткізді. Оның айтуынша, жуық арада төлемдер жүргізіледі. Қажетті құжат­тың бәрі рәсімделген. Президент аман қалған, бірақ зар­дап шегіп, жұмысқа жарамсыз болып қалған адамдардың жайы не болып жатқанын сұрады. «Жалпы 52 адам зардап шеккен. Оларға жергілікті атқарушы органдар мен Еңбек және халықты әлеуметтік қорғау министрлігі көмек көрсете­ді», – деді Роман Скляр. Президент бұл бағыттағы жұмысты жеделдетуді тапсырды. Үкіметтің кеңейтілген отырысынан кейін журналистер сұрағына жауап берген Роман Скляр Bek Air компа­ниясы жолаушыларға тиісті қаржыны қайтаруға міндетті екенін айтады:

 «Компания қаржыны қайтаруға міндетті, бұл – азаматтық-құқықтық қатынас. Сондықтан олар мұны жақын арада жүзеге асыруы керек. Компания бұл мәселені қандай да бір мүлкін сатып немесе басқа әдістермен болса да шешуі тиіс. Кредит алса да, авиа­билетке жұмсалған шығынды қайта­руы қажет», – деді.

Бірер күн бұрын ұшақ апатынан аман қалған жолаушылар өтемақы алуда мәселе туындағанын айтқан бо­латын. «Юстус» заңгерлік кеңес пала­та­сының төрағасы Жанетта Бегах­метованың айтуынша, жолаушы­лар­дың заттары жоғалған. Полиция табылған заттарды иелеріне қайтарып жатыр, алайда кей заттар жарамсыз болып қалған: ноутбук, ұялы теле­фондар пайдалануға келмейді. Сон­дықтан заңгерлік кеңес палатасы материалдық шығынның орнын тол­тыру бойынша азаматтық шағым дайындап жатыр. Ұшақ апатынан зардап шеккендердің мәселесі күрделене түскен. Мысалы, былтыр үш бөлмелі пәтер алу үшін Еуразиялық банктен кредит алған адам ұшақ апатынан көз жұмды, соңында әйелі мен үш баласы және пәтер үшін алын­ған несиесі қалды. Үлкен баласы – 13 жаста, кенжесі – 3-те. Адвокат әйелмен бірге Ұлттық банк пен Қар­жы нарығын реттеу агенттігіне хат жазып, баспана үшін берілген кре­дит­ті ке­шіруді сұраған. Себебі әйелдің табысы кредит төлеу тұрмақ, ба­лаларын асы­рауға әрең жетеді екен. Осыған ұқсас мәселе өте көп дейді заңгер.   Тұмар МЫРЗА