Ұлттық мәдениет пен өнердің алтын діңгегі саналатын жыраулық өнерді жан-жақты дәріптеу қажет. Осы мақсатта Қызылорда облысы Қармақшы ауданында Жыраулар үйі біршама жұмыс атқарып келеді. Нәтижесі де көңіл қуантады. Күні кеше орталық шәкірттері Әзірбайжанда өткен Мугам фестивалінде бас жүлдеге ие болды.
Әлемнің 16 мемлекетінен жас өнерпаздар қатысқан мәдени шарада Тоғжан Бақытова мен Ділназ Ташмұхаммед жеңімпаз атанып қайтты. Өнер ордасында тәлім алып жүрген жас өрендер Өзбекстан, Қытай, Ресей және өз еліміздегі байқаулардан толағай табыспен оралып жүр.
Бүгінгі таңда Жыраулар үйінде Тұңғыш Президент – Елбасы Нұрсұлтан Назарбаевтың «Болашаққа бағдар: рухани жаңғыру» бағдарламасы бағытында игілікті істер атқарылып келеді. Еске сала кетсек, Жыраулар үйі 2006 жылы Қармақшы ауданының орталығы – Жосалы кентінде тұсауын кескен еді. Оған кезінде жыраулық өнерді дәріптеу бағытында үлкен үлес қосқан Көшеней Рүстембековтің есімі берілді. Содан бері бұл жер кәсіпорын ретінде қызметін жалғастырып, жас ұрпаққа ұлағат сыйлайтын қасиетті шаңыраққа айналды.
Жыраулар үйінде қазіргі таңда жалпы саны алты үйірме бар. Оның бесеуі жыраулық өнерді дәріптеуге бағытталған. Халық арасында жиі айтылатын «Сыр елі – жыр елі» деген нақыл сөзді жергілікті өнер иелері осылайша кеңінен дәлелдеп, қанша ғасырдан бері сақталып келе жатқан дәстүрлі өнердің деңгейін биіктете түсті. Қазіргі күні өнер ордасында жүзден астам жас өрен алдыңғы буынның дәрісін тыңдап, жыраулықтың мөлдір бұлағынан шөлін қандырып келеді.
Орталықтың Тұрмағамбет, Көмекбаев, Қуаңдария, Ақжар ауылдарында бөлімшелері жұмыс істейді. Бұл шаңырақта Көшенейдің туған інісі Бидас Рүстембеков қызмет атқарып, шәкірт баулу ісіне зор үлесін қосып отыр. Бүгінде шәкірттер халықаралық деңгейдегі өнер шараларында жоғары жетістіктерге қол жеткізіп келеді. Солардың бірі – Арай Оңғарқызы бұл бағытта зор табысқа қол жеткізіп үлгерді. Сондай-ақ Өнер үйінің ұстаздары да тиісті орындардан алғысхаттар алып, мақтау қағаздарына ие болып жүр.