«Өткен күннен белгі бар» демекші, тарихтан сыр шертер музей көбінесе мемлекеттің қаражатымен құрылады. Бұл үрдісті Батыс Қазақстан облысының шалғай ауылында тұратын зейнеткер Кәрім Өтеғұлов «бұзып», қаржысына тарихи-өлкетану музейін ашты.
Бұл музейде ұжымдастыру, саяси қуғын-сүргін және Екінші дүниежүзілік соғыс кезеңіндегі ауыл тарихы көрініс тапқан. «Болашаққа бағдар: рухани жаңғыру» бағдарламасы аясында ашылған музейде 15 шақты ауыл тұрғыны жұмыс істейді. Жасы сексеннен асқан Кәрім Өтеғұловтың есімі өңір тұрғындарына жақсы таныс. Ол бар қажыр-қайратын өлкенің өркендеуіне жұмсады. «Іскер басшының, әсіресе, тұралаған шаруашылықтарды қайта түлетудегі еңбегі бір төбе. Зейнет жасына жеткен соң асылтұқымды мал басын көбейтіп, кәсіпкерлікке ден қойды. Ұрпақ тәрбиесін де ұмытпай, ел ішінде көздің қарашығындай сақталған көне бұйымдарды жинауға кірісті», – дейді ауылдастары. Қазір музейде 3 мыңнан аса құнды жәдігер сақтаулы.
Ақпәтер ауылының тұрғыны Қыдыр Әбдірахманов: «Жалпақтал өңіріне келген қонақтар естіп, осы мекемеге жиі бас сұғады, риза болып кетеді. Өңіріміздің кен байлықтары мен табиғи өсіп-өнетін аң-құстарымен танысып, өздеріне қажетті мәліметтерді алып отырады. Жалпы, музейдің жас ұрпақ үшін пайдасы мол деп есептейміз», – дейді. Ақпәтер ауылдық тарихи-өлкетану музейінің меңгерушісі Кәрім Өтеғұлов «Аудан бойынша лагердегі 91 оқушы келді. Ауылдың адамдары, сосын басқа мектептің оқушылары лек-легімен келіп тұрады. Той болса басқа жақтан келген адамдар келіп көреді. Мұның бәрі де болашағымыз үшін», – дейді.
Музейді жасақтауға кәсіпкер 13 миллион теңге қаржысын құйған. «Кейін дайын музейді мемлекетке еш ақы-пұлсыз сыйға тартамын» деген ол, әлі де дамыта түсетін тұстарының бар екенін айтады. Өңір басшыларының қолдауымен келер ұрпақ үшін тағылымы мол нысан бүгінде облыстық музейдің филиалына айналған. Ал қосалқы ғимаратты салуға облыс бюджетінен 64 миллион теңге бөлінген екен. Музей аумағына 300-ден аса жеміс ағашы да егілген. Көбін Кәрім Өтеғұлов Әзірбайжан елінен өзі әкеліпті.
Перизат САҒАНТАЙ