Оның айтуынша, облыста 6 айда өндірісте болған 100-ден астам қылмыстық істің 74 пайызы ауыр қылмысқа жатады. Оның ішінде 36 адамға қатысты 42 іс сотқа жолданған. Бұдан бөлек, облыстағы жүйелі сыбайлас жемқорлықтың 6 фактісі анықталып, 28 қылмыс әшкереленген. Нәтижесінде, 19 адам жауапқа тартылыпты.
«Мысалы, облыстың Мәдениет, мұрағаттар және құжаттама басқармасының басшысына қатысты қылмыстық іс сотқа жіберілді. Ол басқа мемлекеттік мекемелер мен ұйымдар басшыларымен қылмыстық сөз байласып, «Рухани жаңғыру» мемлекеттік бағдарламасы шеңберінде жүзеге асырылатын жобаларды іске асыру бойынша мемлекеттік сатып алуды өткізу кезінде жүйелі негізде пара алу және бюджет қаражатын ұрлау бойынша сыбайлас жемқорлық схемаларын ұйымдастырған», – дейді М.Төлеубаев.
Шағын және орта бизнес қызметіне араласудың бірқатар фактілерінің де жолы кесілген. Бір мысал, алдау жолымен компания директорынан өнеркәсіптік қауіпсіздік саласындағы жұмыстарды жүргізуге аттестат алуға байланысты мәселені шешуге 800 мың теңге сомасында ақшалай қаражат алғаны үшін Индустриялық даму және өнеркәсіптік қауіпсіздік комитеті департаментінің басшысы сотталды. Лауазымды тұлғалардың көлеңкелі экономика субъектілеріне қамқорлық жасау фактісі анықталып, мемлекетке келтірілген залалдың 500 миллион теңгесі өтелген.
