Жалпы, Жамбылда ауруларға арналған төсек-орын 715-тен 1 780-ге дейін артты. Уақытша стационардағы төсек жүктемесі 33 пайызға, ал реанимация бөлімшелерінде 13 пайызға азайды.
Қазіргі таңда COVID-19 және пневмониямен ауыратын науқастарды емдеу үшін стационарлық төсек-орын жеткілікті. Аурухана қызметкерлеріне арналған жеке қорғаныс құралдарының резерві де қалыптасып отыр.
Төсек қорын қажетті құрал-жабдықпен жабдықтау жұмысы жүйелі жүргізіліп, қолданыстағы 146 ӨЖЖ аппаратынан бөлек, қосымша 250 оттегі концентраторы, 62 ӨЖЖ аппараты (олардың 19-ы жеткізілген), 270 оттегі концентраторы (200-і жеткізілген) сатып алынбақ.
Жедел жәрдем бригадаларының саны 68-ден 92-ге жетті десек, шілде айында жедел жәрдемді шақыртулар саны 10 пайызға төмендеген.
Өңірде науқастарды дәрі-дәрмекпен қамтамасыз ету мәселесі де кезең-кезеңімен шешілуде. Облыстық Денсаулық сақтау басқармасы «СҚ-Фармация» ЖШС-нің өңірдегі өкілдерімен тұрақты келіссөз жүргізіп, жалпы сомасы 1,2 миллиард теңгеге дәрі-дәрмек сатып алуға қосымша өтінім жасаған. Бүгінде 471 миллион теңгеге препараттар жеткізілген. Медициналық мекемелерге 56,7 мың таблетка және 75,3 мың құтыдағы антибиотиктер, 13,1 мың антикоагулянттар, шприцтер, 16,5 мың вирусқа қарсы препараттар және 2,5 мың дене қызуын түсіретін дәрілер келіп түсті.
Сондай-ақ Өзбекстаннан дәрі-дәрмек сатып алуға жергілікті бюджеттен ақша бөлінуде. Бүгінгі таңға 10,2 миллион теңгеге дәрі-дәрмектің кезекті партиясы келді. Бұған дейін 24 миллион теңгенің дәрі-дәрмегі көрші мемлекеттен жеткізілген болатын.
Бизнес өкілдері де мұқтаж жандарға коронавируспен күресуге көмектесуде. Кәсіпкерлер дәрі-дәрмек пен медициналық мақсаттағы бұйымдарды сатып алуға ақша жинап, демеушілер есебінен 3 ӨЖЖ аппараты және 82 оттегі концентраторын сатып алды.
Одан бөлек, гуманитарлық көмек аясында Катар, Қытай, Өзбекстан, Түркия, Біріккен Араб Әмірлігінен жеке қорғаныс құралдары, экспресс-тесттер, антисептикалық және дәрі-дәрмек жеткізілді.
Облыста ПТР зерттеуге арналған 6 зертхана бар десек, симптомсыз емделушілер мен коронавирус инфекциясының жеңіл белгілері бар науқастарды толық есепке алу, үйде медициналық көмек көрсету үшін 214 мобильді топ құрылған. Олардың құрамына дәрігерлер, медбикелер және әлеуметтік қызметкерлер енген. Мемлекеттік органдардың 78 қызметтік көлігі уақытша мобильді бригадаларға беріліп отыр.
Қазіргі таңда облыстың 116 мектебінде алғашқы медициналық көмек пункті ашылған. Тағы бір жағымды жаңалық – Жамбыл облысына Татарстан елінен бір топ дәрігер келді. Шетелдік мамандар медициналық көмек көрсету, коронавирус инфекциясы мен пневмонияны емдеу бойынша тәжірибе алмасу мақсатында аймаққа атбасын бұрып отыр.
Келген дәрігерлердің қатарында дәрігер-инфекционист, анестезиолог-реаниматолог, эпидемиолог және амбулаториялық-емханалық қызметтің мамандары бар.
Бүгінгі күні өңірде коронавирус инфекциясымен және пневмониямен сырқаттанушылық жағдайының тұрақтану үрдісі байқалғанына қарамастан, шетелдік әріптестердің тәжірибесі өз нәтижесін береді деп күтілуде.
Облыс әкімдігі Денсаулық сақтау басқармасының басшысы Марат Жұманқұловтың айтуынша, Татарстаннан келген мамандар коронавирус пен пневмония аймағындағы емдеу хаттамаларымен танысып, жергілікті дәрігерлерге консультациялық және әдістемелік көмек көрсетеді.
– Келгендердің барлығы жоғары санаттағы білікті мамандар. Олар облыстық денсаулық сақтау жүйесінің, коронавирус және пневмониямен ауыратын науқастарды емдеумен айналысатын ұйымдардың жұмысымен танысатын болады. Бұл ауруханалардан бөлек емханалық нысандарға, орталық аудандық ауруханаларға жоспарланған. Ресейде коронавирусты емдеудің жақсы тәжірибесі қалыптасты. Менің ойымша, ресейлік мамандардың келуі бізге кейбір мәселелерді қайта қарап, осы бағыттағы жұмыстарды жақсарта түсуге мүмкіндік береді, – дейді М.Жұманқұлов.– Бұл екіжақты сапар. Біз коронавирус инфекциясын емдеудегі тәжірибелерімізді салыстыру, ауыр науқастарды күту моделі, медициналық көмек көрсету құрылымының қалай ұйымдастырылғанын көру, өз тәжірибеміздің тиімді тұстарымен бөлісу мақсатында келдік, – дейді өз кезегінде Татарстан Денсаулық сақтау министрлігінің республикалық клиникалық онкологиялық диспансерінің анестезиолог-реаниматологі Александр Ванюшин.
Айта кету керек, бұл шара облыс әкімі Бердібек Сапарбаевтың Татарстан президенті Рустам Миннихановпен келісімі бойынша Ресейдегі Қазақстан елшілігінің және мемлекет қайраткері Иманғали Тасмағамбетовтің қолдауымен ұйымдастырылып отыр. Мұндай келісім көкжиегінің коронавируспен күресте теңдессіз көмегі болады деп сенеміз.
