33 жастағы Деревянченко болса 37 жастағы қарсыласының бокстағы уақыты соңына келді деп есептейді
Қазақстандық кәсіпқой боксшы Геннадий Головкин мен украиналық Сергей Деревянченко орта салмақта IBF титулына таласар алдында көз түйістіру рәсімін өткізді.
Олар Нью-Йоркте кездесіп, баспасөз мәслихатын жасады. Қазақстандық боксшы бойында аздап қорқыныш пайда болғанын да жасырмады.
«Мен өте толқып тұрдым. Біріншіден, өзімнің екінші үйіме оралғаным үшін қуаныштымын. Барлық карьерам бойына мені қолдап келе жатқан Madison Scuare Garden аренасына айтар алғысым зор. Алдағы жағдайды ойлап әрине толқимын. Дәл қазір бокс әлемінде ең үздік адамдармен жұмыс істеп жатырмын және менде ең үздік қарсылас бар, ол – Сергей Деревянченко. Мен оны бұрыннан танимын.
Ол шын мәнінде өте жақсы спортшы. Бұл ойын емес, нағыз шайқас. Мен аздап қорықтым, өйткені ол сенімді – бапкерін тыңдаңызшы. Оныкі де дұрыс. Командасы өте күшті.
Мен неліктен қорықтым? Ол өте мығым, күшті көрінеді. Құдды дәл қазір оның уақыты туған секілді. Мүмкін, солай. Мүмкін! Бұл – бокс. Сондықтан алда не боларын ешкім білмейді. Егер нағыз айқасты, керемет шоуды көргіңіз келсе онда 5 қазан күні біздің бокс кешіне келіңіздер» депті Головкин.
33 жастағы Деревянченко болса 37 жастағы қарсыласының бокстағы уақыты соңына келді деп есептейді.
«Madison Square Garden аренасына қайта келу өте жағымды. Өз командама ерекше алғыс айтамын. Бұл кездесуді қабыл алып, келісім жасасқаны үшін Головкин командасына да рахмет айтамын.
Кіммен жұдырықтасатынымды жақсы түсініп тұрмын. Ол әлемнің бұрынғы чемпионы және орта салмақтағы көшбасшы адам. Әрине, оның карьерасы соңына тақап келе жатыр. Мен бұл жағдайды біржола расқа айналдырғым келеді» депті Деревянченко.
Еске салсақ, осыдан бірнеше күн бұрын бұл айтулы жекпе-жек туралы ресми жарияланған болатын. Ал бүгінгі баспасөз мәслихатына санаулы күндер қалғанда Головкин жаңа промоутермен жұмыс істейтінін жария етті.
