Келісімшарт алдағы үш футбол маусымына жасалды. Футболшының команда құрамына қосылуына португалдық бапкер Педру Эмануэл септігін тигізді. Ол клуб басшылығына ойыншыны команда сапында сақтап қалуды тапсырды.
Исламхан келісімшартқа қол қоюдан бұрын БАӘ-дегі карантин талабына сәйкес жеті күнге оқшауланды. Коронавирусқа байланысты екі мәрте сынама тест тапсырды. Толық медициналық қадағалаудан өтті.
Бауыржан биыл 31 қаңтарда «Әл-Айн» командасымен маусым айына дейін келісімшартқа қол қойған болатын. Футболшы 10 рет жасыл алаңға шықты. Қарсыластар қақпасын 1 мәрте дәл көздеп, 3 рет нәтижелі пас берді. Наурыз айында коронавирус пандемиясына байланысты аталған мемлекетте барлық жарыстар тоқтатылды. Кейіннен футбол біріншілігі аяқталғаны жөнінде шешім қабылданды.
Айта кетейік, Бауыржан Исламхан алдағы уақытта командадағы өзге әріптестерімен бірге оқу-жаттығу жиынына қатысады. Футболдан БАӘ чемпионаты 3 қыркүйекте басталады деп жоспарланып отыр.
