Ұлттық банк төрағасымен кездесу барысында Nur Otan партиясы Саяси кеңесінің кеңейтілген отырысында Қазақстанның Тұңғыш Президенті ұсынған ел экономикасының одан ары өсуін ынталандыру шаралары талқыланды. Сонымен қатар, Нұрсұлтан Назарбаевқа инфляцияның қазіргі жағдайы мен елімізде несиелік-қаржылық саясатты жүзеге асыру барысы жөнінде мәлімет берілді.
Алматы қаласының әкімімен кездесуде Қазақстанның Тұңғыш Президентіне Nur Otan партиясы қалалық филиалының партия жұмысын жүйелі жаңғырту бағдарламасы бойынша жоспарлары баяндалды.
Б.Сағынтаев Елбасына партияның қалалық филиалы Саяси кеңесінің кеңейтілген отырысының нәтижелері жөнінде мәлімет берді. Nur Otan партиясының Төрағасы Президент пен партияның сайлауалды тұғырнамасының, сондай-ақ съездерде қабылданған шешімдердің сапалы орындалуын қадағалауды қамтамасыз етуді тапсырды. Сонымен бірге, Қазақстанның Тұңғыш Президенті партия алаңында азаматтық қоғам мен мемлекеттік органдардың тиімді өзара іс-қимылы үшін жағдай жасаудың маңызына ерекше назар аударды.
Сондай-ақ кездесу барысында Nur Otan фракциясының қалалық мәслихаттағы рөлін арттыру, сыбайлас жемқорлыққа қарсы жұмысты күшейту және Jas Otan Жастар қанатының белсенділігін арттыру мәселелері талқыланды.