Nur Оtan партиясы саяси кеңесінің отырысында Елбасы – партия Төрағасы Нұрсұлтан Назарбаев ел дамуының негізгі бағыттары бойынша бірқатар нақты тапсырмалар берді. Осыған орай, саясаттанушы Расул Жұмалыға хабарласып, партияның алдағы атқаруы тиіс міндеттеріне қатысты пікірін білдік.
– Расул Берекетұлы, таяуда өткен Nur Оtan партиясы Саяси кеңесінде айтылған мәселелермен таныссыз. Сіздің ойыңыздан шыққан қандай бағыттар болды?
– Сөз жоқ, билік партиясына деген көзқарасты өзгертетін уақыт жетті. Ең алдымен, ол көзқарасты өзгертуге, ел сенімін қайтаруға Nur Оtan-ның өзі, әрбір мүшесі дайын болуы керек. Елбасы – партия Төрағасы Н.Назарбаевтың бағдарламаны «Сенім. Диалог. Болашаққа нық қадам» деп атауының маңызы осында жатыр деп білемін. Себебі, соңғы уақыттары партияның беделіне нұқсан келетін біршама оқиға болды. Алайда оған қатысты партия мүшелерінің ешқайсысы ел алдына шығып, ашық пікір білдірген емес. Партия басшылығында қаншама лауазымды тұлға, әкімдер, министрлер бар. Дегенмен олардың дені өз тарапынан қоғамдағы қордаланған мәселеге, елімізде болып жатқан оқиғаларға қатысты ашық көзқарас, пікір білдірмейді, жауапкершіліктен қашады. Тек партия Төрағасы – Елбасының кезекті мәлімдемесін, тапсырмасын күтіп отырады. Сол себепті, де біздің қоғамда партия қызметіне деген сенім азайып кетті деп ойлаймын. Менің пайымымша, Nur Оtan партиясының әртүрлі деңгейдегі басшылары мен мүшелеріне ашықтық қажет. Олар тек кабинетте отырып алып, пікір айта бермей, ел ішіне барып сөйлессін. Нақты жағдайды көзбен көрсін. Өңірлерде шешілмеген қандай мәселе бар? Халық биліктен нені талап етіп отыр? Осы сұрақтарға жауапты жоғарыдан күтіп отырмай, елдің, сайлаушылардың өз аузынан естіп-білгені жөн.
– Елбасы – Nur Оtan партиясының Төрағасы Н.Назарбаев Саяси кеңес отырысында партия кадр таңдаудың тиімді жүйесін қалыптастыру керек екенін айтты. Сіздің ойыңызша, бұл іс қалай жүргені дұрыс?
– Елбасы бұл мәселені жақсы біліп, байқап отыр. Кешегі кеңесте осы мәселені көтеруінің өзі біраз жайды аңғартады. Ең алдымен, «тазалауды» партияның ішінен бастау керек. Елде болып жатқан кез келген жағдайға байланысты жауапты тұлғалар, партия мүшелері жауап беруі керек. Бұл тұрғыда Nur Оtan батыл қадамдарға баруы тиіс. Партияға мүшелікке жастарды тартуда да қалыптасып қалған дәстүр бойынша белгілі жұлдыздарды, өнердегі жастарды емес, саяси сауаты айқын, пікірін ашық айтатын озық ойлы ұландарды қабылдау қажет. Дамыған елдерде сауатты, білімді, қолынан іс келетін адамдар бәсекеге түсіп, ашық қоғам қалыптастыруға күш жұмсайды. Бүгінгі біздің қоғам да сондай қадамды күтеді. Яғни, қоғамда пікірі жоқ, тым «сыпайы, тәртіпті» тұлғалардан адамдар шаршады. Партия халықтың сөзін ашық сөйлей алмаған соң, тіпті кей жағдайда сөйлегесі келмеген соң қазір адамдар әлеуметтік желіде пікірін өзі айтып, «өз қотырын өзі қасуға» дағдыланып барады. Қазір сауатты жастар, Еуропа көрген, былғанбаған жастар елімізде көп. Олардың билік партиясы өзіне тарта алмаса, бұрынғы ескі кадрлармен өзгеріс жасау қиын. Тіпті кейбір лауазымды тұлғалар ашық алаңда өзінің Nur Оtan-ның мүшесі екенін айтудан қашатынын байқап жүрміз. Ол дегеніңіз – жауапкершіліктен қашу. Елбасы Н.Назарбаев та Саяси кеңес барысында әкімдердің, шенеуніктердің жүрген жерінде партияның «значогын» тақпайтынын бекер сынға алмаса керек. Партия қызметіне адал, жауапты адамдарды таңдайтын уақыт жетті. Сол себепті, партияның ішінара үлкен өзгерістер жасауы – бүгінгі күннің басты талабы.
– Өзіңіз айтып отырған ішінара өзгерістер, кадарлық ауыс-түйістер қазірден басталып та кеткендей. Басшылықтың жаңа құрамына қандай кеңес, ұсыныс айтар едіңіз?
– Әрине, партияның хатшылығына, аппарат басшылығына жастар келіп жатқанын естіп, біліп отырмыз. Бірақ Nur Оtan үшін бұл өзгерістер аз. Партия басшылығына келген азаматтар өздері оқып келген, көріп, таныған Еуропа елдеріндегі ашық қоғамды біртіндеп біздің елге де сіңіруі керек. Ол солай болады деп сенемін. Сондай-ақ алдағы уақытта Nur Оtan ашық сайлау өткізуге мұрындық болуы керек. Бәсекелестік болмаған жерде монополия болады. Ал монополияның баратын жері – батпақ. Nur Оtan партиясына жүктелер үлкен міндет те елді, қоғамды осы әр саладағы монополиядан құтқарып, бәсекелестік қоғамға дайындау болса құба-құп.