Оқушылар 1 қыркүйектен бастап I тоқсанды қашықтан оқиды. Қашықтан білім беру бойынша видеосабақтарды түсіру, цифрлы білім беру ресурстарын дайындау жұмыстары жүріп жатыр.«Шалғайда орналасқан шағын жинақты мектептерді қоспағанда 1 қыркүйектен бастап еліміздің барлық мектебіндегі 1-11-сынып оқушылары үшін оқу жылының алғашқы тоқсанын қашықтан оқыту форматында өтеді», – деді Асхат Аймағамбетов орталық коммуникациялар қызметінде өткен брифингте.
Оған қоса, 1 қыркүйекке дейін аймақ әкімдіктері қосымша компьютер сатып алады. Білім және ғылым министрінің айтуынша, қазір компьютерге қатысты ауқымды жұмыс атқарылып жатыр.
«Бізде ескірген компьютер көп. Қажет ететін оқушыларға уақытша бере тұруға болатын компьютер аз. Сондықтан қазіргі уақытта 36 мыңнан астам компьютер сатып алынды. 1 қыркүйекке дейін аймақ әкімдіктері қосымша компьютер сатып алады. Үкімет отырысында осындай тапсырма берілді», – деді ол.
Үкімет басшысы Асқар Мамин Денсаулық сақтау мен Білім және ғылым, Цифрландыру министрліктері бойынша 1 қыркүйектен бастап орта мектептерде бірінші тоқсанды қашықтан оқыту форматында өткізуге дайын болуын қамтамасыз етуді тапсырды.
«Қажет болған жағдайда бастауыш сынып оқушылары ата-аналарының жазбаша өтініштері бойынша санитарлық-эпидемиологиялық талаптарды қатаң сақтай отырып, кезекші сыныптардың қызметін қамтамасыз етуді тапсырамын», – деді ол.
Айта кетерлігі, мектепке дейінгі ұйымдар жұмыс істемейді. Карантин уақыты аяқталғанға дейін эпидемиологиялық жағдайға байланысты шешім қабылданады.
